ଢେଙ୍କାନାଳ ଅଫିସ,୨୫।୯: ଢେଙ୍କାନାଳ ଜିଲା କଣ୍ଠାବଣିଆ ଥାନା ୫୫ ନମ୍ବର ଜାତୀୟ ରାଜପଥ ଇଟାପ ଛକ ନିକଟରେ ରବିବାର ଅପରାହ୍ନରେ ଏକ ଦୁର୍ଘଟଣା ଘଟିଛି। ବଅଁରପାଳ ଆଡୁ ଆସୁଥିବା ଏକ ବାଇକ୍କୁ ବିପରୀତ ଦିଗରୁ ଆସୁଥିବା ଏକ ଟ୍ରକ ଧକ୍କା ଦେଇଥିଲା । ଫଳରେ ବାଇକ୍ରେ ଥିବା ମନୋରମା ମିଶ୍ର ଟ୍ରକ ଚକ ତଳେ ଚାପି ହୋଇ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି ।
ଦୁର୍ଘଟଣାରେ ବାଇକ୍ ଚାଳକ ତଥା ମନୋରମାଙ୍କ ସ୍ବାମୀ ସୁବାସ ଚନ୍ଦ୍ର ନନ୍ଦ ଓ ପୁଅ ଗୁରୁତର ଆହତ ହୋଇ ମେରାମୁଣ୍ଡଳୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଛନ୍ତି । ଖବର ପାଇ କଣ୍ଟାବଣିଆ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହିତ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଦୁର୍ଘଟଣା ଘଟାଇଥିବା ଟ୍ରକ୍କୁ ପୋଲିସ ଜବତ କରିଥିବା ବେଳେ ଚାଳକ ଫେରାର ଥିବା ଜଣାପଡିଛି। ଗଁଦିଆ ଥାନା ଅବଳର ସୁବାସ ନିଜ ପରିବାର ସହ ବଅଁରପାଳରେ ରହି ଏକ ଘରୋଇ ସଂସ୍ଥାରେ କାମ କରୁଥିଲେ। ହେଲେ ମହାଳୟା ପାଇଁ ସୁବାସ ସ୍ତ୍ରୀ ମନୋରମା ଓ ଅଢେଇ ବର୍ଷର ଶିଶୁପୁତ୍ରଙ୍କୁ ଧରି ଧଳପୁର ଗ୍ରାମକୁ ବାଇକରେ ଯାଉଥିବା ବେଳେ ଇଟାପ ଛକରେ ଏହି ଦୁର୍ଘଟଣା ଘଟିଥିଲା।