ବେଜିଂ,୧ା୯: ସମ୍ପ୍ରତି ଚାଇନାରେ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଯାହାକୁ ଦେଖି ଲୋକଙ୍କ ଲୋମ ଟାଙ୍କୁରି ଯାଉଛି। ସୋସିଆଲ ମିଡିଆରେ ଜଣେ ମହିଳା ନିଜର ନବଜାତ ଶିଶୁକୁ ଡଷ୍ଟବିନ୍ରେ ଫିଙ୍ଗି ଦେଇଥିବା ସିସିଟିଭି ଫୁଟେଜରୁ ଜଣାପଡ଼ିଛି। ଏହା ପରେ ୟୁଜରମାନେ ଭୟଙ୍କର ଭାବରେ ରାଗି ଯାଇଛନ୍ତି। ଏହି ମହିଳା ଲିଫ୍ଟ ଭିତରେ ନିଜ ସନ୍ତାନକୁ ଜନ୍ମ ଦେଇଥିଲେ। ସିସିଟିଭି ଫୁଟେଜ ଅନୁଯାୟୀ, ଅଗଷ୍ଟ ୨୧ରେ ମହିଳା ଜଣକ ଏକ ଘରୋଇ ସୋସାଇଟିର ଲିଫ୍ଟରେ କିଛି ଲଗେଜ ନେଇ ପ୍ରବେଶ କରିଥିଲେ। ଏହି ହାଉସିଂ ସୋସାଇଟି ଚାଇନାର ଦକ୍ଷିଣ ପଶ୍ଚିମ ମ୍ୟୁନିସିପାଲିଟିରେ ଅବସ୍ଥିତ। ଫୁଟେଜ ରେକର୍ଡରୁ ଜଣାପଡ଼ିଛି ମହିଳା ଜଣକ ପ୍ରଥମେ ନଇଁ ପଡ଼ି ପ୍ୟାଣ୍ଟରୁ ଏକ ନବଜାତ ଶିଶୁକୁ ବାହାର କରୁଛନ୍ତି। ଏଥିରେ ଦେଖାଯାଉଛି ମହିଳା ଜଣକ ଶାନ୍ତ ଭାବରେ ଏକ ଟିସୁ ବ୍ୟବହାର କରି ଶିଶୁର ରକ୍ତ, ପୋଷାକ ଏବଂ ଚଟାଣକୁ ପୋଛୁଛନ୍ତି। ଅନ୍ୟମାନେ ଲିଫ୍ଟରେ ପ୍ରବେଶ କରିବା ବେଳେ ମହିଳା ନବଜାତ ଶିଶୁକୁ ଏକ କୋଣରେ ଲୁଚାଇ ରଖିଥିଲେ। ଯାହାଫଳରେ ସେମାନେ ଏହାକୁ ଦେଖି ପାରିବେ ନାହିଁ। ଶେଷରେ ମହିଳା ନିଜର ଲଗେଜ ଏବଂ ଶିଶୁର ଜନ୍ମର କିଛି ମିନିଟ ପରେ ଲିଫ୍ଟରୁ ବାହାରି ଯାଆନ୍ତି। ତା’ପରେ ସେ ପିଲାଟିକୁ ଡଷ୍ଟବିନ୍ରେ ପକାଇ ଦେଉଛନ୍ତି। ମହିଳା ଦ୍ୱିତୀୟ ଲିଫ୍ଟକୁ ଯିବା ପୂର୍ବରୁ ରକ୍ତ ଜୁଡୁବୁଡୁ ଜୋତା ମଧ୍ୟ ସଫା କରିଥିଲେ। ଏକ ସ୍ଥାନୀୟ ଗଣମାଧ୍ୟମରେ ଏହି ଖବର ପ୍ରକାଶ ପାଇଛି।
ଜଣେ ବୃଦ୍ଧା ଏହି ମହିଳାଙ୍କର ଏହି ଅଦ୍ଭୁତ ଆଚରଣ ଦେଖିଥିଲେ କିନ୍ତୁ ଡଷ୍ଟବିନ୍ରେ ନବଜାତ ଶିଶୁକୁ ଫିଙ୍ଗିବା ଦେଖିପାର ନ ଥିଲେ। ସୌଭାଗ୍ୟବଶତଃ ସ୍ଥାନୀୟ ଲୋକମାନେ ଏହି ଶିଶୁକୁ ଅଳିଆ ଗଦାରୁ ପାଇ ଚୋଙ୍ଗକିଙ୍ଗର ଏକ ଡାକ୍ତରଖାନାକୁ ପଠାଇଥିଲେ। ଶିଶୁର ଲିଙ୍ଗ ପ୍ରକାଶ କରାଯାଇ ନାହିଁ। ଡାକ୍ତରଖାନାର ଜଣେ ସିକ୍ୟୁରିଟି ଗାର୍ଡ ଏହି ଘଟଣା ବିଷୟରେ ଅଧିକ ବିବରଣୀ ଗଣମାଧ୍ୟମ ସହିତ ଶେୟାର କରିଛନ୍ତି। ସେ କହିଛନ୍ତି, ମହିଳା ଜଣକ ଚୋଙ୍ଗକିଙ୍ଗ ଯାତ୍ରା କରିଥିବା ଟୁର୍ ଗ୍ରୁପର ଏକ ଅଂଶ ଥିଲେ। ସେ ଏବଂ ଟୁର୍ ଗାଇଡ ପିଲାଟିକୁ ନେବା ପାଇଁ ଆମ ଡାକ୍ତରଖାନାକୁ ଆସିଥିଲେ।
ଚାଇନା ପୋଲିସ ଅଧିକାରୀମାନେ ମଧ୍ୟ ମହିଳାଙ୍କ ବିବୃତ୍ତି ନେବାକୁ ଆସିଥିଲେ ଯେ ସେ କାହିଁକି ଏପରି କଲେ। ଡାକ୍ତରଖାନାର ଶିଶୁ ବିଭାଗର ଜଣେ ଡାକ୍ତର କହିଛନ୍ତି, ପିଲାଟି ଭଲ ଅଛି ଏବଂ ତାଙ୍କୁ ଡିସଚାର୍ଜ କରାଯାଇଛି। ଶିଶୁଟିକୁ ତାଙ୍କ ପିତାମାତା ନେଇଯାଇଥିବା ଡାକ୍ତର କହିଛନ୍ତି। ଡାକ୍ତର କହିଛନ୍ତି, ଯେତେବେଳେ ପିଲାଟି ହସ୍ପିଟାଲରେ ଥିଲା, ସେତେବେଳେ ତାଙ୍କ ମା’ ଏବଂ ଜେଜେମା ତାଙ୍କ ଯତ୍ନ ନେଇଥିଲେ। ପୋଲିସର ତଦନ୍ତ ଚାଲିଛି କିନ୍ତୁ ମା’ଙ୍କୁ କୌଣସି ଦଣ୍ଡ ମିଳିବ କି ନାହିଁ ତାହା ସ୍ପଷ୍ଟ ହୋଇନାହିଁ।
