ଚନ୍ଦାହାଣ୍ଡି, ୪ା୭(ଡି.ଏନ୍.ଏ.): ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକରେ ପୁଣି ଜନନୀ ଯନ୍ତ୍ରଣା। ଖରାପ ରାସ୍ତା ଯୋଗୁ ଗାଁକୁ ଆସିପାରିଲାନି ଆମ୍ବୁଲାନ୍ସ। ଆମ୍ବୁଲାନ୍ସ ପର୍ଯ୍ୟନ୍ତ ଚାଲିକି ଯିବାବେଳେ ଗର୍ଭବତୀ ଜଣଙ୍କ ରାସ୍ତାକଡ଼ରେ ପ୍ରସବ କରିଛନ୍ତି। ଏହା ହେଉଛି ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ପାଟଖଲିଆ ପଞ୍ଚାୟତ ଅଧୀନ ଗୋରଝରିଆ ଗ୍ରାମର ଘଟଣା।
ଗୋରଝରିଆ ଗ୍ରାମର ଯୁଗେଶ୍ବର ଗୌଡ଼ଙ୍କ ସ୍ତ୍ରୀ ରମୁଲାଙ୍କ ପ୍ରସବ ବେଦନା ହେବାରୁ ପରିବାର ଲୋକେ ଆମ୍ବୁଲାନ୍ସ ଡକାଇଥିଲେ। ତେବେ ଗୋରଝରିଆ ରାସ୍ତା କାଦୁଅ ପଚପଚ ଥିବାରୁ ଗାଁକୁ ଆମ୍ବୁଲାନ୍ସ ଯାଇ ନ ଥିଲା। ପରିବାର ଲୋକେ ବାଧ୍ୟ ହୋଇ ରମୁଲାଙ୍କୁ ଚଲାଇ ଚଲାଇ କାଦୁଅ ରାସ୍ତା ପାର କରାଉଥିବାବେଳେ ସେ ରାସ୍ତା କଡ଼ରେ ହିଁ ସନ୍ତାନ ଜନ୍ମ ଦେଇଥିଲେ। ଉକ୍ତ ଖବରପାଇ ପାଟଖଲିଆ ସମିତି ସଭ୍ୟ ତୁରନ୍ତ ନିଜ ଗାଡି ପଠାଇ ମା ଓ ଶିଶୁକୁ ଚନ୍ଦାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ଏହି ଘଟଣା ପାଟଖଲିଆ ପଞ୍ଚାୟତ ପାଇଁ ନୂଆ ନୁହେଁ। ଏଥିପୂର୍ବରୁ ମଧ୍ୟ ଏପରି ଘଟଣା ଘଟିଛି। ପ୍ରଶାସନ, ସ୍ଥାନୀୟ ବିଧାୟକ, ଏମ୍ପି ରାସ୍ତା ନିର୍ମାଣ ପାଇଁ ଉଦ୍ୟମ କରୁନଥିବା ପାଟଖଲିଆ ସମିତିସଭ୍ୟା ନିରୁପମା ଧୁରୁଆ ଏବଂ ପିସିସି ସମ୍ପାଦକ କ୍ଷେମରାଜ ବାଘ ଅଭିଯୋଗ କରିଛନ୍ତି।