ଟିକିରି,୩୦ା୧୦(ଡି.ଏନ୍.ଏ.): ପକ୍କାରାସ୍ତା ନ ଥିବାରୁ ଗାଁକୁ ଆମ୍ବୁଲାନ୍ସ ଆସିପାରିଲାନାହିଁ । ଗର୍ଭବତୀଙ୍କୁ ଭାରରେ ବୋହି ନେବାବେଳେ ଅଧାବାଟରେ ପ୍ରସବ କରିଛନ୍ତି। ରାୟଗଡ଼ା ଜିଲା କାଶୀପୁର ବ୍ଲକ ମାଇକଞ୍ଚ ପଞ୍ଚାୟତର ସିନ୍ଧିଗୁଡ଼ା ଗ୍ରାମରେ ଶନିବାର ଏଭଳି ଘଟଣା ଘଟିଛି। ଗାଁର ଲମ୍ବୋଦର ଗୌଡ଼ଙ୍କ ସ୍ତ୍ରୀ କୁନ୍ତଳାଙ୍କ ଗର୍ଭ ଯନ୍ତ୍ରଣା ହେବାରୁ ପରିବାର ଲୋକେ ଏବଂ ଆଶାକର୍ମୀ ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। ଗାଁକୁ ରାସ୍ତା ନ ଥିବାରୁ ୨ କି.ମି. ପୂର୍ବରୁ କଞ୍ଚଗୁମା ଶିବମନ୍ଦିର ନିକଟରେ ଆମ୍ବୁଲାନ୍ସ ଅଟକିଯାଇଥିଲା। ଆଶାକର୍ମୀ ମାଣିକ ଦଳପତି, ଆମ୍ବୁଲାନ୍ସ କର୍ମଚାରୀ ପରିକ୍ଷିତ ନାଏକ ଓ କୈଳାସ ଲିମା ଗର୍ଭବତୀଙ୍କୁ ଭାରରେ ବୋହି ଆମ୍ବୁଲାନ୍ସ ନିକଟକୁ ନେଉଥିବାବେଳେ ଅଧାବାଟରେ ପ୍ରସବ କରିଥିଲେ। ପରେ ମା’ ଏବଂ ନବଜାତ ଶିଶୁକନ୍ୟାକୁ ଡଙ୍ଗାସିଲ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଉଭୟଙ୍କ ସ୍ବାସ୍ଥ୍ୟାବସ୍ଥା ଠିକ୍ ଥିବା ଡାକ୍ତର ନିରଞ୍ଜନ ରଇତ ସୂଚନା ଦେଇଛନ୍ତି।