ଯାଜପୁର ଟାଉନ,୯ା୯(ଡି.ଏନ.ଏ.): ଯାଜପୁର ଟାଉନ ଥାନା ଅନ୍ତର୍ଗତ ବୃନ୍ଦାବନପୁର ଗ୍ରାମରେ ଯୌତୁକ ପାଇଁ ଜଣେ ମହିଳାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ଏନେଇ ପୋଲିସ ଏକ ମାମଲା ରୁଜୁ କରିବା ସହ ତାଙ୍କ ସ୍ବାମୀ ବିଶ୍ୱଜିତ ରଥଙ୍କୁ ଗିରଫ କରି କୋର୍ଟଚାଲାଣ କରିଛି।
ବଡ଼ଚଣା ବ୍ଲକ୍ ଧାନମଣ୍ଡଳ ଦେବତାସାହି ଗ୍ରାମର ନରେନ୍ଦ୍ର ଦେବତାଙ୍କ ଝିଅ ନିବେଦିତା ଦେବତା ବିଶ୍ୱଜିତଙ୍କୁ ୨୦୨୦ରେ ବୈଦିକ ରୀତିରେ ବିବାହ କରିଥିଲେ। ବିବାହ ସମୟରେ ବର ପକ୍ଷରୁ ଦାବି ମୁତାବକ ୨ ଲକ୍ଷ ଟଙ୍କା କନ୍ୟାଘର ପକ୍ଷରୁ ପ୍ରଦାନ କରାଯାଇଥିଲା। ମାତ୍ର ବିବାହଘର କିଛିଦିନ ପରେ ଅଧିକ ୨ ଲକ୍ଷ ଟଙ୍କା ଓ ୫ ଭରି ସୁନା ଆଣିବାକୁ ନିବେଦିତାଙ୍କୁ ଶାଶୁଘର ଲୋକେ ଚାପ ପକାଉଥିଲେ। ଏପରି କି ମହିଳାଙ୍କ ସ୍ବାମୀ ବିଶ୍ୱଜିତ, ଶ୍ୱଶୁର ଅଶୋକ, ଶାଶୁ, ନଣନ୍ଦ ଓ ନଣନ୍ଦେଇ ମିଳିତଭାବେ ନିବେଦିତାଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଇଆସୁଥିଲେ। ଗତ ୪ ତାରିଖ ସକାଳ ପ୍ରାୟ ୮ଟାରେ ନିବେଦିତା ତାଙ୍କ ମା’ଙ୍କ ସହ କଥା ହେବା ବେଳେ ତାଙ୍କୁ ମାରିଦେବାକୁ ଯୋଜନା ପ୍ରସ୍ତୁତି କରାଯାଉଛି ବୋଲି କହିଥିଲେ। ତେଣୁ ତାଙ୍କୁ ଏଠାରୁ ନେଇଯିବା ପାଇଁ କହିବା ସମୟରେ ଫୋନ୍ଟିକୁ କେହି ଜଣେ ଛଡାଇ ନେଇଥିଲେ ବୋଲି ନିବେଦିତାଙ୍କ ବାପା ନରେନ୍ଦ୍ର ଥାନାରେ ଲିଖିତ ଅଭିଯୋଗ କରିଛନ୍ତି। ପରେ ନିବେଦିତାଙ୍କ ଅସୁସ୍ଥ ଖବର ପାଇ ବାପଘର ଲୋକେ କଟକ ବଡମେଡିକାଲରେ ପହଞ୍ଚତ୍ବା ପରେ ନିବେତାଙ୍କ ମୃତ୍ୟୁ ହୋଇଥିଲା। ତାଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ଚିହ୍ନ ଥିବାରୁ ତାଙ୍କୁ ଶାଶୁ ଘର ଲୋକେ ହତ୍ୟା କରିଛନ୍ତି ବୋଲି ଅଭିଯୋଗରେ ଦର୍ଶାଯାଇଛି। ଏନେଇ ଥାନାରେ ନଂ.୩୧୭/୨୨ରେ ମାମଲା ରୁଜୁ ହୋଇଛି। ଅନ୍ୟ ଅଭିଯୁକ୍ତ ଫେରାର ଥିବା ଜଣାପଡ଼ିଛି।
