ଆନନ୍ଦପୁର/ଘସିପୁରା,୧୬।୧୦(ସ୍ବ.ପ୍ର./ଡି.ଏନ୍.ଏ.): କେନ୍ଦୁଝର ଜିଲା ଘସିପୁରା ଥାନା ଅଧୀନ ଅମାରଙ୍ଗ ଗ୍ରାମ ନିକଟ ବୈତରଣୀ ନଦୀରେ ଏକ ମୁଣ୍ଡ ବିହୀନ ମୃତଦେହ ମିଳିଛି। ଗ୍ରାମର କିଛି ଲୋକ ନଦୀ ପାର ହୋଇ ଅପରପାର୍ଶ୍ୱକୁ ଯିବା ସମୟରେ ପାଣିରେ ଏକ ମୁଣ୍ଡ ବିହୀନ ମୃତଦେହ ଭାସୁଥିବା ଘଟଣା ଦେଖିବାକୁ ପାଇଥିଲେ। ଘଟଣା ସମ୍ପର୍କରେ ସୂଚନା ପାଇ ଘସିପୁରା ପୋଲିସ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଥିଲା। ମୃତଦେହଟି ଅମାରଙ୍ଗ ଗ୍ରାମର ବିଧବା ସୁରଥୀ ନାଇକ(୫୦) ବୋଲି ଜଣାପଡିଥିଲା।
ପୋଲିସ ସୂଚନା ଅନୁଯାୟୀ, ସୁରଥି ନିଜର ଦୁଇ ଝିଅଙ୍କର ବିବାହ କାର୍ଯ୍ୟ ଶେଷ କରିବା ପରେ ଘରେ ଏକା ରହିଆସୁଥିଲେ। ବିଭିନ୍ନ ସମୟରେ ତାଙ୍କ ଦେଢଶୁର ନିଶାସକ୍ତ ଅବସ୍ଥାରେ ତାଙ୍କୁ ଗାଳିଗୁଲଜ କରୁଥିଲେ। ଗୁରୁବାର ରାତିରେ ସୁରଥି ଅନ୍ୟ ଜଣଙ୍କ ଘରକୁ ଟିଭି ଦେଖିବାକୁ ଯାଉଥିବା ସମୟରେ ତାଙ୍କ ଦେଢଶୁର ଝଗଡା କରିଥିଲେ। ସେ ଉତ୍ତ୍ୟକ୍ତ ହୋଇ ମା’ଙ୍କ ମୁଣ୍ଡ ଗଣ୍ଡି ଅଲଗା କରି ନଦୀରେ ଫିଙ୍ଗି ଦେଇଥିବା ମୃତ ସୁରଥୀଙ୍କ ଝିଅ ତାଙ୍କ ବଡ଼ବାପାଙ୍କ ନାଁରେ ଥାନାରେ ଅଭିଯୋଗ କରିଛନ୍ତି। ଏନେଇ ଏକ ହତ୍ୟା ମାମଲା (ନଂ.୨୧୨/୨୦୨୧) ରୁଜୁ କରି ତଦନ୍ତ ଚାଲିଛି। ଘଟଣା ଦିନ ଠାରୁ ସୁରଥୀଙ୍କ ଦେଢଶୁର କେଉଁଆଡେ ଫେରାର ହୋଇଯାଇଛନ୍ତି। ଅନ୍ୟ ଜଣକୁ ଅଟକ ରଖି ପଚରାଉଚୁରା ଜାରି ରହିଥିବା ଘସିପୁରା ଥାନା ଅଧିକାରୀ ଶ୍ୟାମଘନ ବେହେରା କହିଛନ୍ତି।