ନନ୍ଦାହାଣ୍ଡି,୪ା୯(ଡି.ଏନ୍.ଏ.): ଚାଷୀଙ୍କୁ ୟୁରିଆ ସାର ନ ଦେଇ ଚୋରାଚାଲାଣ ହେଉଥିଲା। ଏହାର ପ୍ରତିବାଦରେ ମହିଳା ଚାଷୀମାନେ ଲ୍ୟାମ୍ପ୍ସ କାର୍ଯ୍ୟାଳୟରେ ଶନିବାର ତାଲା ପକାଇ ଦେଇଥିଲେ।
ନବରଙ୍ଗପୁର ଜିଲା ନନ୍ଦାହାଣ୍ଡି ବ୍ଲକ ଡଙ୍ଗରଭେଜାସ୍ଥିତ ସମବାୟ ସମିତି ଏମ୍ଡି ଥବୀର ଜାନି ୟୁରିଆ ଚୋରାଚାଲାଣ କରି ଚଢ଼ା ଦରରେ ବିକ୍ରି କରୁଥିବା ଚାଷୀମାନେ ଅଭିଯୋଗ କରିଛନ୍ତି। ଅଭିଯୋଗ ପରେ ନନ୍ଦାହାଣ୍ଡି ତହସିଲଦାର ଏ. ସ୍ନେହଲତା ଶୁକ୍ରବାର ଲ୍ୟାମ୍ପ୍ସକୁ ଯାଇ ଘଟଣାର ତଦନ୍ତ କରିଥିଲେ। ଏହି ସମୟରେ ଗଚ୍ଛିତ ସାର, କାଗଜପତ୍ର ଏବଂ ଏମ୍ଡିଙ୍କ ହିସାବରେ ତାଳମେଳ ରହି ନ ଥିବା ଜାଣିବାକୁ ପାଇଥିଲେ।
ସୂଚନାଯୋଗ୍ୟ, ଏ ବର୍ଷ ମୋଟ ୨୧୨୦ ବସ୍ତା ୟୁରିଆ ଲ୍ୟାମ୍ପ୍ସକୁ ଆସିଥିବା ବେଳେ କେବଳ ୧୯୦୦ ବସ୍ତା ସାର ଚାଷୀଙ୍କୁ ଦିଆଯାଇଥିବା ହିସାବ ରହିଛି। ସିନ୍ଧିଗୁଡ଼ା, ପୋଡ଼ାଲଗୁଡ଼ା ଏବଂ ନନ୍ଦାହାଣ୍ଡି ପଞ୍ଚାୟତର ଚାଷୀଙ୍କୁ ୟୁରିଆ ନ ଦେଇ ଦିନ ପରେ ଦିନ ଗଡ଼େଇ ନେଉଛନ୍ତି। ଏଥିରେ ଚାଷୀ ଉତ୍ତ୍ୟକ୍ତ ହୋଇ ଶନିବାର ଲ୍ୟାମ୍ପ୍ସ କାର୍ଯ୍ୟାଳୟରେ ତାଲା ପକାଇଥିଲେ। ଶତାଧିକ ମହିଳାଚାଷୀ ତହସିଲ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ। ଲ୍ୟାମ୍ପ୍ସ ଏମ୍ଡି ଏବଂ କୃଷି ଅଧିକାରୀ ସତ୍ୟ ନାଗଙ୍କଠାରୁ ତହସିଲଦାର ଘଟଣା ବୁଝି ପୁଣି ୪୦୦ ବସ୍ତା ୟୁରିଆ ଯୋଗାଇବା ପାଇଁ ପ୍ରତିଶ୍ରୁତି ଦେଇଛନ୍ତି।
