ଦିଗପହଣ୍ଡି,୨୨ା୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଚିକିଟି ଚାନ୍ଦପୁର ପଞ୍ଚାୟତ ବେଲପନ୍ଥି ଗ୍ରାମର ରଞ୍ଜନ କୁମାର ଗୌଡ଼ଙ୍କ ସ୍ତ୍ରୀ ସନ୍ଧ୍ୟାରାଣୀ ଗୌଡ଼ ଗତ ୧୭ ଦିନ ହେଲା ନିଖୋଜ ଥିବା ଜଣାପଡିଛି। ନିଖୋଜ ଘଟଣା ସମ୍ପୂର୍ଣ୍ଣ ରହସ୍ୟମୟ ବୋଲି ତାଙ୍କ ସ୍ବାମୀ ରଞ୍ଜନ ଅଭିଯୋଗ କରିଛନ୍ତି। ଗତ ୫ ତାରିଖରେ ଦିଗପହଣ୍ଡି ଥାନା ବି. ତୁରୁୁବୁଡି ଗ୍ରାମରେ ରହୁଥିବା ତାଙ୍କ ଶାଶୁ ସବିତା ଗୌଡ଼ ବେଲପନ୍ଥି ଗ୍ରାମକୁ ଆସି ତାଙ୍କ ଝିଅ ସନ୍ଧ୍ୟାରାଣୀ ଏବଂ ସାନ ନାତୁଣୀ ବେବିଙ୍କୁ ତାଙ୍କ ଘରକୁ ନେବାକୁ ଚାହିଁଥିଲେ। ରଞ୍ଜନ ଆପତ୍ତି କରିବା ସତ୍ତ୍ୱେ ସ୍ତ୍ରୀ ସନ୍ଧ୍ୟାରାଣୀ ସାନ ଝିଅ ବେବିିଙ୍କୁ ସାଙ୍ଗରେ ନେଇ ମାଆ ସହ ବି. ତୁରୁୁବୁଡି ଗ୍ରାମକୁ ଯାଇଥିଲେ। ସ୍ତ୍ରୀ ତାଙ୍କ ବାପ ଘରକୁ ଯିବାର ୫ ଦିନ ପରେ ରଞ୍ଜନ ତାଙ୍କୁ ଆଣିବା ପାଇଁ ଶ୍ୱଶୁର ଘରକୁ ଯାଇଥିଲେ। ସେଠାରେ ତାଙ୍କ ସ୍ତ୍ରୀ ନଥିବା ବେଳେ ସାନ ଝିଅ ଥିବା ଦେଖିଥିଲେ। ଶାଶୁଙ୍କୁ ପଚାରିବାରୁ ସନ୍ଧ୍ୟାରାଣୀ ଅଜା ଘର ହିଞ୍ଜିଳି ବ୍ଲକ ଗୌଡ଼ପଲ୍ଲୀ ଗ୍ରାମକୁ ଯାଇଥିବା ସଫେଇ ଦେଇଥିଲେ। ଗୌଡ଼ପଲ୍ଲୀ ଗ୍ରାମରେ ମଧ୍ୟ ତାଙ୍କ ସ୍ତ୍ରୀ ସନ୍ଧ୍ୟାରାଣୀ ନଥିବା ଖବର ପାଇବା ପରେ ସେ ଦିଗପହଣ୍ଡି ଥାନାରେ ପହଞ୍ଚି ଏହି ରହସ୍ୟଜନକ ନିଖୋଜ ଘଟଣା ସମ୍ପର୍କରେ ଥାନାରେ ଏତଲା ଦେଇଛନ୍ତି। ଏତଲାକୁ ଭିତ୍ତିକରି ଆଇଆଇସି ପ୍ରଶାନ୍ତ କୁମାର ପାତ୍ର ଥାନା ନିଖୋଜ ମାମଲା ନଂ.୬/୨୫ ଅନୁଯାୟୀ ମକଦ୍ଦମା ରୁଜୁ କରି ଏସଆଇ ସୋଫିଆ ମିଶ୍ରଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦେଇଥିବା ଜଣାପଡିଛି।
