ଟିକିରି,୨୦।୩: ରାୟଗଡା ଜିଲା କାଶିପୁର ଟିକିରିରେ ଦୀର୍ଘ ୩ ମାସ ହେଲା ପାଣି ସମସ୍ୟା ଦେଖାଦେଇଛି। ଏହାକୁ ବିରୋଧ କରି ରାଜରାସ୍ତାକୁ ମହିଳାମାନେ ଓହ୍ଲାଇଛନ୍ତି। ମହିଳାମାନେ ହାଣ୍ଡି ଏବଂ ବାଲ୍ଟି ଧରି ପ୍ରତିବାଦ କରୁଥିବା ଦେଖିବାକୁ ମିଳିଛି। ପ୍ରଶାସନ ପକ୍ଷରୁ ପ୍ରତ୍ୟେକ ଘରକୁ ପାଣି ପାଇଁ ଷ୍ଟାଣ୍ଡ ପୋଷ୍ଟ ଲଗାଇ ବିଲ କରାଯାଇଛି ହେଲେ ପାଣି ଆସୁନି। ଫଳରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ। ଟିକିରି ଝୋଡିଆ ସାହିରେ ପିଇବା ପାଣି ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ହେଲେ ବାସ୍ତବରେ ଏହାର ବିପରୀତ ଚିତ୍ର ଦେଖୁବାକୁ ମିଳିଛି। ଟିକିରିର ୨ଟି ସ୍ଥାନରେ ରାସ୍ତା ଅବରୋଧ କରାଯାଇଛି। ଦୋରା ସାହି ଏବଂ ହରିଜନ ସାହି ବାସିନ୍ଦା ରାସ୍ତା ଅବରୋଧ କରିଛନ୍ତି।
ପାଣି ନ ପାଇ ଲୋକେ ଝରଣା ନଦୀ ପାଣି ପିଇ ପୁଣି ଝାଡାବାନ୍ତି ହେବାର ଆଶଙ୍କା ରହିଛି। ତୁରନ୍ତ ବିଶୁଦ୍ଧ ପାଣି ଯୋଗାଇ ଦେବାକୁ ଅଞ୍ଚଳର ବୁଦ୍ଧିଜୀବୀ ଦାବି କରିଛନ୍ତି। ସେପଟେ ମହିଳାଙ୍କ ଦ୍ୱାରା ରାସ୍ତାରୋକୋ ଦ୍ୱାରା ରାସ୍ତା ଜାମ ରହିଛି। ଟିକିରି ପୋଲିସ ଘଟଣାସ୍ଥଳକୁ ଯାଇ ବୁଝାସୁଝା କରିଥିଲେ ସୁଦ୍ଧା ଲୋକେ ମାନି ନାହାନ୍ତି। ପ୍ରଶାସନ ପକ୍ଷରୁ ପ୍ରତିଶ୍ରୁତି ନ ମିଳିଲେ ରାସ୍ତାରୁ ହଟିବେ ନାହିଁ ବୋଲି ମହିଳାମାନେ କହିଛନ୍ତି l