ନୂଆଦିଲ୍ଲୀ: ବିଶ୍ୱର ବୃହତ୍ତମ ଯାତ୍ରୀବାହୀ ବିମାନ କମ୍ପାନୀ ମଧ୍ୟରୁ ଅନ୍ୟତମ ଏମିରେଟ୍ସ ଏୟାରଲାଇନ୍ସ ଏହାର ନୂତନ ବିଜ୍ଞାପନକୁ ନେଇ ଚର୍ଚ୍ଚାରେ। ୟୁଏଇର ଏହି ବିମାନ କମ୍ପାନୀର ନୂତନ ବିଜ୍ଞାପନ ବେଶ୍ ଆକର୍ଷଣୀୟ ହୋଇଛି। ସୋସିଆଲ ମିଡିଆ ଆକାଉଣ୍ଟରେ ଶେୟାର କରାଯାଇଥିବା ବିଜ୍ଞାପନର ଭିଡିଓରେ ବିମାନର କ୍ରୁ ସଦସ୍ୟ ଭଳି ପୋଷାକ ପିନ୍ଧିଥିବା ଜଣେ ମହିଳା ବୁର୍ଜ ଖଲିଫା ଉପରେ ଛିଡ଼ା ହୋଇଛନ୍ତି। ତାଙ୍କ ହାତରେ କିଛି ପ୍ଲା କାର୍ଡ ରହିଛି। ସେ ଗୋଟିଏ ପରେ ଗୋଟିଏ କାର୍ଡରେ ଥିବା ବାର୍ତ୍ତାକୁ ସମସ୍ତଙ୍କୁ ଦେଖାଉଛନ୍ତି।
ତେବେ ୩୦ ସେକେଣ୍ଡର ଏହି ଭିଡିଓ ଦେଖି ସମସ୍ତେ ଆଶ୍ଚର୍ଯ୍ୟ ହେଉଛନ୍ତି। ଏତେ ଉଚ୍ଚତାରେ ସନ୍ତୁଳନ ବଜାୟ ରଖିବା ସହଜ କଥା ନୁହେଁ। ଟିକିଏ ଭୁଲ ହେଲେ ବଡ଼ ଦୁର୍ଘଟଣା ଘଟିପାରିଥାନ୍ତା ବୋଲି ଲୋକେ କହୁଛନ୍ତି।
ତେବେ ବିଜ୍ଞାପନରେ ନଜର ଆସୁଥିବା ମହିଳା ହେଉଛନ୍ତି ନିକାଲ ସ୍ମିଥ-ଲୁଡଓ୍ବିକ। ପେସାରେ ସେ ଜଣେ ସ୍କାଏଡାଇଭିଂ ପ୍ରଶିକ୍ଷକ। ଭିଡିଓର ଆରମ୍ଭରୁ ସେ ବୁର୍ଜ ଖଲିଫା ଉପରେ ଛିଡ଼ା ହୋଇଥିବା ଜଣାପଡ଼ୁ ନ ଥିଲେ ହେଁ ପରର କିଛି ସେକେଣ୍ଡ ଭୟଙ୍କର ହୋଇଛି। ସବୁଠାରୁ ଉଚ୍ଚ କୋଠା ଉପରୁ ଦୁବାଇର ଦୃଶ୍ୟ ମନମୁଗ୍ଧ କରୁଛି।
ନିକୋଲ ଏହି ଭିଡିଓକୁ ନିଜ ଇନଷ୍ଟାଗ୍ରାମ ଆକାଉଣ୍ଟରେ ମଧ୍ୟ ଶେୟାର କରିଛନ୍ତି। ସେ କହିଛନ୍ତି, ଆଜି ପର୍ଯ୍ୟନ୍ତ ଯେତେ ଷ୍ଟଣ୍ଟ କରିଛି ସେଥିମଧ୍ୟରୁ ଏହା ସବୁଠାରୁ ଆଶ୍ଚର୍ଯ୍ୟଜନକ ଏବଂ ରୋମାଞ୍ଚକର ଥିଲା। ଏଭଳି ସୃଜନଶୀଳ ମାର୍କେଟିଂ ପ୍ରସ୍ତାବ ପାଇଁ ଏମିରେଟ୍ସକୁ ଧନ୍ୟବାଦ। ସେମାନଙ୍କ ଟିମ୍ର ଅଂଶ ହେବା ଖୁସିର କଥା।