ଆସିକା,୮।୭(ଡି.ଏନ୍.ଏ.): ଗାଙ୍ଗପୁର ଥାନା ଚଞ୍ଚରାପଲ୍ଲୀ ଗ୍ରାମର ସାଇବାଣୀ ଗୌଡ ୫ବର୍ଷ ହେଲା ନିଖୋଜ ଥିଲେ। ତାଙ୍କୁ ଗାଙ୍ଗପୁର ପୋଲିସ ହରିୟାଣାର ଶିର୍ଶା ଜିଲା ଅନ୍ତର୍ଗତ ଏଲାନାବାଗରୁ ଉଦ୍ଧାର କରି ମଙ୍ଗଳବାର ଗାଁକୁ ଆଣିଥିଲେ। ତେବେ ପରିବାରରେ ତାଙ୍କ ରହିବା ନେଇ କୌଣସି ସହମତି ନ ହେବାରୁ ଗୁରୁବାର ଗୋପାଳପୁରସ୍ଥିତ ସୁଧାର ଗୃହରେ ଛାଡି ଦିଆଯାଇଥିବା ଥାନା ଅଧିକାରୀ ଶୁଭେନ୍ଦୁ କୁମାର ସାହୁ କହିଛନ୍ତି। ସାଇବାଣୀ କେଉଁ ପରିସ୍ଥିତିରେ ଏଠାରୁ ହରିୟାଣା ଯାଇଥିଲେ ତାହା ସ୍ପଷ୍ଟ ଭାବେ କହି ପାରୁନାହାନ୍ତି। ସେଠାରେ ଏକ ରୋଷେଇ କେନ୍ଦ୍ରରେ ନିୟୋଜିତ ଥିଲେ ଓ ତାଙ୍କୁ ବାହାରକୁ ଛଡା ଯାଉ ନ ଥିଲା ବୋଲି ପୋଲିସ ନିକଟରେ କହିଛନ୍ତି। କୌଣସି ପରିସ୍ଥିତିରେ ସେ ବାହାରକୁ ଖସି ଆସିବା ପରେ ସେଠାକାର ପୋଲିସ ୪ମାସ ହେଲା ଏକ ସୁଧାର ଗୃହରେ ରଖିଥିଲା। ମହିଳାଙ୍କ ସମ୍ପର୍କରେ ସୋସିଆଲ ମିଡିଆରେ ଏହି ଖବର ଭାଇରାଲ ହେବା ପରେ ଗତ ଶନିବାର ଗାଙ୍ଗପୁର ଥାନାର ଏକ ପୋଲିସ ଟିମ୍ ହରିୟାଣାର ଯାଇ ତାଙ୍କୁ ଉଦ୍ଧାର କରି ଆଣିଥିଲା।