ବ୍ୟାଙ୍କକ୍: ପୂର୍ବତନ ପ୍ରେମିକଙ୍କଠାରୁ ପ୍ରତିଶୋଧ ନେଲେ ଜଣେ ଯୁବତୀ, ସେ ବି ଏମିତି ଯେ ଶୁଣିଲେ ଆପଣ ଚକିତ ହୋଇଯିବେ। ପ୍ରତିଶୋଧ ନେବାକୁ ସେ ପ୍ରେମିକଙ୍କ ବାଇକରେ ନିଆଁ ଲଗାଇ ଦେଇଛନ୍ତି। ସିସିଟିଭି ଫୁଟେଜରେ ଏହି କାର୍ଯ୍ୟ କଏଦ ହୋଇଥିଲା। ଏବେ ସୋସିଆଲ ମିଡିଆରେ ତାହା ଭାଇରାଲ ହେଉଛି।
ଘଟଣାଟି ଥାଇଲାଣ୍ଡର। ୩୬ ବର୍ଷୀୟ କାନୋକ ଓ୍ବାନ୍ ବ୍ୟାଙ୍କକର ଏକ ସ୍କୁଲର ପାର୍କିଂ ସ୍ଥାନରେ ଛିଡ଼ା ହୋଇଥିବା ଦୁଇ ଚକିଆ ଯାନକୁ ପେଟ୍ରୋଲ ଢ଼ାଳି ନିଆଁ ଲଗାଇ ଦେଇଥିଲେ। କାରଣ ସେ ତାଙ୍କ ପୂର୍ବ ପ୍ରେମିକଙ୍କଠାରୁ ପ୍ରତିଶୋଧ ନେବାକୁ ଚାହୁଁଥିଲେ। ଘଟଣା ସମ୍ପର୍କରେ ଖବର ପାଇ ଅଗ୍ନିଶମ କର୍ମଚାରୀମାନେ ନିଆଁକୁ ଆୟତ୍ତ କରିବା ପାଇଁ ସେଠାରେ ପହଞ୍ଚିଥିଲେ। ସେତେବେଳକୁ ପାଖରେ ଥିବା ଅନ୍ୟ ୬ଟି ଚକିଆ ଯାନରେ ମଧ୍ୟ ନିଆଁ ଲାଗିଯାଇଥିଲା।
ପୋଲିସ ଅଧିକାରୀଙ୍କଠାରୁ ମିଳିଥିବା ସୂଚନାନୁଯାୟୀ, ଶ୍ରୀନଖରିନଭିରୋଟ ବିଶ୍ୱବିଦ୍ୟାଳୟ ପ୍ରସାରମିତ ଡେମୋଷ୍ଟ୍ରେଶନ ସ୍କୁଲ ଭିତରେ ଥିବା ପାର୍କିଂ କୋଠାର ତୃତୀୟ ମହଲାରେ ଅଗ୍ନିକାଣ୍ଡ ଘଟିଥିବା ନେଇ ସୂଚନା ମିଳିଥିଲା। ମହାମାରୀ ଯୋଗୁ ଛାତ୍ରମାନେ ଘରୁ ଅନଲାଇନ୍ କ୍ଲାସ ନେଉଥିବାରୁ କେହି ଆହତ ହୋଇ ନ ଥିଲେ। ତେବେ ଅଗ୍ନିଶମ କର୍ମଚାରୀ ପହଞ୍ଚିବା ପରେ ସେମାନେ ୧୦ ମିନିଟ ମଧ୍ୟରେ ନିଆଁକୁ ନିୟନ୍ତ୍ରଣକୁ ଆଣିଥିଲେ। ସୁରକ୍ଷା କ୍ୟାମେରା ଫୁଟେଜ ଯାଞ୍ଚ ସମୟରେ ମହିଳାଜଣଙ୍କ ସ୍କୁଲ କର୍ମଚାରୀଙ୍କ ପୂର୍ବତନ ଗର୍ଲଫ୍ରେଣ୍ଡ ବୋଲି ଜଣାପଡ଼ିଥିଲା। ବୁଧବାର ତାଙ୍କୁ ଗିରଫ କରାଯାଇଥିଲା। ତେବେ ସେ ପ୍ରେମରେ ଥିବା ସମୟରେ ପୂର୍ବ ପ୍ରେମିକଙ୍କୁ ୨୩ ଟଙ୍କା ମୂଲ୍ୟର ଏକ ବାଇକ ଉପହାରରେ ଦେଇଥିଲେ। ହେଲେ ଉଭୟ ଅଲଗା ହେବାପରେ ସେ ପୁଣିଥରେ ତାଙ୍କ ପାଖକୁ ଫେରିବାକୁ ଚାହୁଁଥିଲେ। ଏଥିରେ ଅରାଜି ହେବାରୁ ସେ ପ୍ରତିଶୋଧ ପରାୟଣ ହୋଇ ଏଭଳି କାଣ୍ଡ ଭିଆରିଥିବା ଜଣାପଡ଼ିଛି। ଏନେଇ ପୋଲିସ ତାଙ୍କୁ ପଚରାଉଚରା କରୁଥିବା ବେଳେ ଘଟଣାର ତଦନ୍ତ ଚାଲିଛି।