ପଟ୍ଟାଙ୍ଗି, ୨୯।୩(ଡି.ଏନ୍.ଏ.): ଘରେ ରଖିଥିବା ଦେଶୀ ବନ୍ଧୁକ କାଢ଼ିବାବେଳେ ଅସାବଧାନତା ହେତୁ ଗୁଳି ଫୁଟି ପାଖରେ ଥିବା ଜଣେ ମହିଳାଙ୍କର ମୃତ୍ୟୁ ହୋଇଛି। ସେ ହେଲେ କୋରାପୁଟ ଜିଲା ପଟ୍ଟାଙ୍ଗି ଥାନା ଅଧୀନ ନୂଆଁଗା ପଞ୍ଚାୟତ ସଦର ଗ୍ରାମର ଜାନି ମାଙ୍ଗୁଡୁଙ୍କ ସ୍ତ୍ରୀ ମଞ୍ଜୁଳା। ପୋଲିସ ବନ୍ଧୁକ ସଫା କରୁଥିବା ବଇ କମଳୁଙ୍କୁ ଅଟକ ରଖି ପଚରାଉଚରା କରୁଛି। ଚୈତ୍ର ପର୍ବରେ ଶିକାର କରି ପୂଜା କରିବା ଉଦ୍ଦେଶ୍ୟରେ ଘରେ ଥିବା ଦେଶୀ ବନ୍ଧୁକକୁ ଜାନିଙ୍କ ସମ୍ପର୍କୀୟ ବଇ ମଙ୍ଗଳବାର ରାତିରେ ସଫା କରିବା ପାଇଁ ଘର ଆଟୁ ଉପରୁ କାଢ଼ିବାବେଳେ ତାହା ଖସି ପଡ଼ିଥିଲା। ବନ୍ଧୁକରେ ଗୁଳି ଭରି ରହିଥିବାରୁ ତାହା ଫୁଟିଯାଇ ତଳେ ଶୋଇଥିବା ମଞ୍ଜୁଳାଙ୍କ ଦେହରେ ବାଜିଥିଲା। ଗୁଳି ଫୁଟିବା ଶବ୍ଦ ଶୁଣି ଗ୍ରାମବାସୀ ମାଙ୍ଗୁଡୁଙ୍କ ଘରେ ପହଞ୍ଚତ୍ଥିଲେ। ଏହି ସମୟରେ ମଞ୍ଜୁଳା ରକ୍ତ ଜୁଡୁବୁଡୁ ଅବସ୍ଥାରେ ପଡି ରହିଥିଲେ। ବିଳମ୍ବିତ ରାତି ହୋଇଯାଇଥିବାରୁ ସ୍ଥାନୀୟ ଡାକ୍ତରଖାନାକୁ ଆଣି ପାରି ନ ଥିଲେ। ବୁଧବାର ସ୍ବାସ୍ଥ୍ୟକେନ୍ଦ୍ରକୁ ଆଣିବାବେଳେ ମଞ୍ଜୁଳାଙ୍କ ମୃତ୍ୟୁ ହୋଇଯାଇଥିଲା। ଡାକ୍ତରଖାନା କର୍ତ୍ତୃପକ୍ଷ ପୋଲିସକୁ ଖବର ଦେଇଥିଲେ। ସୁନାବେଡ଼ା ଏସ୍ଡିପିଓ ମନୋଜ କୁମାର ବେହେରା ଏବଂ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚତ୍ ମୃତଦେହ ଜବତକରି କେସ୍ ନଂ. ୪୧/୨୩ରେ ଏକ ମାମଲା ରୁଜୁ କରିଛି। ପୋଲିସ ବଇଙ୍କୁ ଅଟକ ରଖି ପଚରାଉଚରା କରୁଛି। ପୋଲିସ ମୃତଦେହ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି।
