ଭଦ୍ରକ ଅଫିସ, ୨୪।୧: ଭଦ୍ରକ ଜିଲା ସଦର ବ୍ଲକ ବାରିକପୁର କାଳିତ୍ରା ମନ୍ଦିର ଛକ ନିକଟରେ ଏକ ହାଇଓ୍ବା ପଛରେ କାର୍ ପିଟି ହେବାରୁ ସ୍ତ୍ରୀଙ୍କ ମୃତ୍ୟୁ ଘଟିଥିବା ବେଳେ ସ୍ବାମୀ ଗୁରୁତର ହୋଇଛନ୍ତି। ମୃତ ମହିଳା ହେଲେ ସୋର ଅଞ୍ଚଳର ସବିତା ଗୁପ୍ତା। ଗ୍ରାମାଞ୍ଚଳ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ସବିତା ଓ ତାଙ୍କ ସ୍ବାମୀ ମନୋଜ ଗୁପ୍ତା କାର୍ରେ ଭୁବନେଶ୍ୱରରୁ ସୋର ଫେରୁଥିଲେ। ଭଦ୍ରକ ୧୬ନଂ. ଜାତୀୟ ରାଜପଥର ବାରିକପୁର କାଳିତ୍ରା ମନ୍ଦିର ଛକ ନିକଟରେ ପୂର୍ବରୁ ଠିଆ ହୋଇଥିବା ବାଲି ବୋଝେଇ ହାଇୱା ପଛପଟେ କାର୍ ପିଟି ହୋଇଥିଲା। ଫଳରେ କାର୍ରେ ଥିବା ଦମ୍ପତି ଗୁରୁତର ହୋଇଥିଲେ। ସେମାନଙ୍କୁ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ସବିତାଙ୍କୁ ମୃତ ଘୋଷଣା କରିଥିଲେ। ଦୁର୍ଘଟଣାରେ କାର୍ଟି ଚୁର୍ମାର୍ ହୋଇଯାଇଛି।
