ବ୍ରହ୍ମପୁର,୨୦।୧୦( ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁର ଅତିରିକ୍ତ ଜିଲା ଦୌରା ଜଜ୍-୩ ରାଜ କୁମାର ଦାଶ ଏକ ହତ୍ୟା ମାମଲାର ଚୂଡାନ୍ତ ରାୟ ଶୁକ୍ରବାର ପ୍ରକାଶ କରିଛନ୍ତି। ଉପଯୁକ୍ତ ପ୍ରମାଣକୁ ଆଧାର କରି ବିଚାରପତି ମହିଳା ସଂଯୁକ୍ତା ବେହେରାଙ୍କୁ ହତ୍ୟା କରିଥିବା ତାଙ୍କ ସଉତୁଣୀ ଲକ୍ଷ୍ମୀ ପ୍ରଧାନଙ୍କୁ ଦୋଷୀସାବ୍ୟସ୍ତ କରିଛନ୍ତି। ବିଚାରପତି ହତ୍ୟାକାରିଣୀଙ୍କୁ ୧୦ ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି। ଏଥି ସହିତ ୫୦ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟେ ଅତିରିକ୍ତ ଦୁଇ ବର୍ଷ ଜେଲଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ଏଥିସହିତ ମୃତ ମହିଳାଙ୍କ ୭ ବର୍ଷର ଝିଅଙ୍କୁ ଆର୍ଥିକ ସହାୟତା ଦେବାକୁ ଜଜ୍ ଜିଲା ଆଇନ ସେବା ପ୍ରାଧିକରଣ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି।
ଘଟଣାରୁ ପ୍ରକାଶ ଯେ, ଜରଡ଼ା ଥାନା ଅଧୀନ କେଲୁଆ ଛକରେ ରହୁଥିବା ଲଳିତ ପ୍ରଧାନ ହାଇଦ୍ରାବାଦରେ ଏକ ଘରୋଇ କମ୍ପାନୀରେ କାମ କରୁଥିବା ବେଳେ ପ୍ରଥମେ ଲକ୍ଷ୍ମୀ ପ୍ରଧାନଙ୍କୁ ପ୍ରେମବିବାହ କରିଥିଲେ। କିଛିବର୍ଷ ପରେ ପୁଣି ଥରେ ସେ ସଂଯୁକ୍ତା ବେହେରାଙ୍କୁ ଦ୍ୱିତୀୟ ବିବାହ କରିଥିଲେ। ୨୦୨୦ରେ ଲଳିତ ତାଙ୍କ କେଲୁଆ ଘରେ ଉଭୟ ସ୍ତ୍ରୀଙ୍କୁ ମିଳିମିଶି ରହିବ ବୋଲି କହି ହାଇଦ୍ରାବାଦ ଚାଲିଯାଇଥିଲେ। ସଂଯୁକ୍ତାଙ୍କ ସହ ତାଙ୍କର ୪ ବର୍ଷର ଶିଶୁକନ୍ୟା ମଧ୍ୟ ରହୁଥିଲା। ୨୦୨୦ ଅଗଷ୍ଟ ୨ ତାରିଖରେ ସଂଯୁକ୍ତାଙ୍କ ଅର୍ଦ୍ଧଦଗ୍ଧ ମୃତଦେହ ପଡିଥିବା ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଥିଲା। ପରେ ମୃତ ମହିଳାଙ୍କ ବାପା କେଶବ ବେହେରାଙ୍କ ଅଭିଯୋଗ କ୍ରମେ ପୋଲିସ ଏକ ହତ୍ୟା ମାମଲା(୧୫୮/୨୦) ରୁଜୁ କରିଥିଲା। ପୋଲିସ ତଦନ୍ତ ପରେ ଉକ୍ତ ଘରେ ରହୁଥିବା ସଂଯୁକ୍ତାଙ୍କ ସଉତୁଣୀ ଲକ୍ଷ୍ମୀ ପ୍ରଧାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା।
ଜବତ ହୋଇଥିବା ଲକ୍ଷ୍ମୀଙ୍କ କପଡାର ରାସାୟନିକ ପରୀକ୍ଷା ପାଇଁ ଆର୍ଏଫ୍ଏସ୍ଏଲ୍କୁ ପୋଲିସ ପଠାଇଥିଲା। ଏଥିରେ କିରୋସିନ ଢାଳି ହତ୍ୟା କରାଯାଇଥିବା ଜଣାପଡ଼ିଥିଲା। ମାମଲାର ବିଚାରଣା ବେଳେ ୧୯ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ଶୁକ୍ରବାର ରାୟ ପ୍ରକାଶ ବେଳେ ଗିରଫ ପରଠାରୁ ବ୍ରହ୍ମପୁର ମଣ୍ଡଳ କାରାଗାରରେ ବିଚାରାଧୀନ ବନ୍ଦୀ ଥିବା ଲକ୍ଷ୍ମୀଙ୍କୁ କଡ଼ା ସୁରକ୍ଷାରେ ଅଣାଯାଇ କୋର୍ଟରେ ହାଜର କରାଯାଇଥିଲା। ସାକ୍ଷୀଙ୍କ ବୟାନ ଓ ହତ୍ୟା ଘଟଣାର ବିଭିନ୍ନ ପାରିପାର୍ଶ୍ୱିିକ ତଥ୍ୟକୁ ଆଧାର କରି ବିଚାରପତି ଉପରୋକ୍ତ ରାୟ ପ୍ରକାଶ କରିଛନ୍ତି। ସରକାରଙ୍କ ପକ୍ଷରୁ ଅତିରିକ୍ତ ପବ୍ଲିକ ପ୍ରସିକ୍ୟୁଟର ବିକ୍ରମ କୁମାର କୁଣ୍ଡୁ ମାମଲା ପରିଚାଳନା କରିଥିଲେ।