ନୂଆଦିଲ୍ଲୀ, ୨୦ା୧୦: ଦିଲ୍ଲୀର ଜଣେ ୩୮ ବର୍ଷୀୟା ମହିଳାଙ୍କୁ ୫ ଜଣ ଅପହରଣ ପରେ ଉତ୍ତରପ୍ରଦେଶର ଗାଜିଆବାଦରେ ଗଣବଳାତ୍କାର କରିଥିବା ଅଭିଯୋଗ ହୋଇଛି। ଅଭିଯୁକ୍ତମାନେ ୨ ଦିନ ଧରି ମହିଳାଙ୍କୁ ବଳାତ୍କାର ସହ ତାଙ୍କ ଗୁପ୍ତାଙ୍ଗରେ ଲୁହାରଡ୍ ପୂରାଇଦେଇଥିଲେ। ଗୋଡ଼ହାତ ବନ୍ଧା ସହ ସେହିପରି ଅବସ୍ଥାରେ ତାଙ୍କୁ ଏକ ବ୍ୟାଗ୍ରେ ପୂରାଇ ରାସ୍ତାକଡ଼ରେ ଛାଡ଼ିଦେଇଥିଲେ। ଗାଜିଆବାଦର ଆଶ୍ରମରୋଡରୁ ପୀଡ଼ିତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି। ଏ ନେଇ ଦିଲ୍ଲୀ ମହିଳା କମିଶନ(ଏନ୍ସିଡବ୍ଲ୍ୟୁ) ଗାଜିଆବାଦ ପୋଲିସକୁ ନୋଟିସ୍ ଜାରି କରିଛନ୍ତି। ଏହି ଘଟଣା ଦିଲ୍ଲୀ ନିର୍ଭୟା କାଣ୍ଡକୁ ପୁଣି ମନେପକାଇଦେଇଛି ବୋଲି ଏନ୍ସିଡବ୍ଲ୍ୟୁ ମୁଖ୍ୟ ସ୍ବାତୀ ମାଲିଓ୍ବାଲ କହିଛନ୍ତି। ପୋଲିସ ୫ ଜଣଙ୍କ ନାଁରେ ମାମଲା ରୁଜୁ କରିଥିବାବେଳେ ୪ ଜଣଙ୍କୁ ଗିରଫ କରିଛି।
ଅନୁସାରେ, ମହିଳା ଜଣକ ଦିଲ୍ଲୀର ଏକ ହସ୍ପିଟାଲରେ ନର୍ସ ଅଛନ୍ତି। ଗତ ୧୬ ତାରିଖରେ ସେ ଭାଇଙ୍କ ଜନ୍ମଦିନ ଉତ୍ସବରେ ସାମିଲ ହେବା ପାଇଁ ଗାଜିଆବାଦରେ ଅଟୋକୁ ଅପେକ୍ଷା କରିଥିଲେ। ସେହି ସମୟରେ ଏକ ଏସ୍ୟୁଭିରେ ଅଭିଯୁକ୍ତମାନେ ତାଙ୍କୁ ଜୋରଜବରଦସ୍ତି ଉଠାଇନେଇଥିଲେ। ୫ ଜଣ ମହିଳାଙ୍କୁ ଗଣବଳାତ୍କାର ପରେ ତାଙ୍କ ସହ ଅମାନବୀୟ କାଣ୍ଡ ମଧ୍ୟ ଘଟାଇଛନ୍ତି। ୧୮ ତାରିଖରେ ଗୁରୁତର ଅବସ୍ଥାରେ ତାଙ୍କୁ ରାସ୍ତାକଡ଼ରୁ ଉଦ୍ଧାର ପରେ ଦିଲ୍ଲୀର ଏକ ହସ୍ପିଟାଲରେ ଭର୍ତ୍ତି କରାଯାଇଛି। ଗାଜିଆବାଦ ପୋଲିସ ଦିନୁ, ଶାହରୁଖ, ଢୋଲା, ଜାଭେଦ, ଔରଙ୍ଗଜେବ୍ ଓରଫ୍ ଜାହିରଙ୍କ ନାଁରେ ମାମଲା ରୁଜୁ ସହ ୪ ଜଣଙ୍କୁ ଗିରଫ କରିଛି। ଢୋଲାଙ୍କୁ ଧରିବା ପାଇଁ ଉଦ୍ୟମ ଜାରି ଥିବା ପୋଲିସ କହିଛି। ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପାଇଁ ଡିସିଡବ୍ଲ୍ୟୁ ମୁଖ୍ୟ ସ୍ବାତୀ ଦାବି କରିଛନ୍ତି।