ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବାରେ ଲାଗିଛି। ଯେଉଁଥିରେ ଏକ ବିବାହ ବାର୍ଷିକୀ ସମାରୋହରେ ଜଣେ ମହିଳା ଏକ ଲମ୍ବା ଏବଂ ଓଜନିଆ ହାର ପିନ୍ଧିଥିବା ନଜର ଆସିଛନ୍ତି। ଫେସ୍ବୁକ୍ ଏବଂ ହ୍ବାଟ୍ସଆପ୍ ସମେତ ଅନ୍ୟ ସୋସିଆଲ ମିଡିଆ ପ୍ଲାଟ୍ଫର୍ମରେ ଏହି ଭିଡିଓ ଶେୟାର କରାଯାଇଛି। ଭିଡିଓଟି ଦେଖିଲେ ଯେ କେହି ଆଶ୍ଚର୍ଯ୍ୟ ହୋଇଯିବ। ସମସ୍ତଙ୍କ ମନରେ ଗୋଟିଏ ପ୍ରଶ୍ନ ନିଶ୍ଚିତ ଉଙ୍କି ମାରିବ ମହିଳା ଜଣକ ବେକରେ ପକାଇଥିବା ଏତେ ଲମ୍ବା ହାର ଅସଲି ସୁନା ନା ନକଲି। ତେବେ ପୋଲିସ ଏହି ଘଟଣା ଉପରୁ ପର୍ଦ୍ଦା ହଟାଇଛି।
କଲ୍ୟାଣ ଗାଁରେ ରହୁଥିବା ବାଲୁ କୋଲି ଏହି ଭିଡିଓରେ ସ୍ତ୍ରୀଙ୍କ ସହିତ ବିବାହ ବାର୍ଷିକୀ ପାଳନ କରୁଥିବା ନଜର ଆସିଛନ୍ତି। କେକ୍ କାଟିବା ପରେ ସେ ତାଙ୍କ ସ୍ତ୍ରୀଙ୍କ ପାଇଁ ଏକ ଗୀତ ଗାଉଥିବା ଦେଖିବାକୁ ମିଳିଛି। ଭିଡିଓରେ ସବୁଠୁ ଚର୍ଚ୍ଚାର ବିଷୟ ହେଲା ମହିଳା ଜଣକ ପିନ୍ଧିଥିବା ଏକ ହାର ତାଙ୍କ ଓଢ଼ଣି ସହ ସମାନ। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ କୋଗାଓଁର ସିନିଅର ପୋଲିସ ଇନ୍ସପେକ୍ଟର ଗଣପତ ପିଙ୍ଗଲେଙ୍କ ଅନୁଯାୟୀ, ଆମେ ଭିଡିଓ ଦେଖିବା ପରେ ସୁରକ୍ଷା ଦୃଷ୍ଟିରୁ ବାଲୁଙ୍କୁ ପଚରାଉଚରା କରିବା ପାଇଁ ଥାନାକୁ ଡାକିଥିଲୁ। ସେ କହିଛନ୍ତି, ତାଙ୍କ ସ୍ତ୍ରୀ ଯେଉଁ ହାର ପିନ୍ଧିଛନ୍ତି ତାହା ଅସଲି ନୁହେଁ। ଏହି ହାର ସେ କଲ୍ୟାଣ ଜୁଏଲାରିରେ ତିଆରି କରିଥିଲେ। ପୋଲିସ ଏହି ଜୁଏଲାରି ମାଲିକଙ୍କୁ ମଧ୍ୟ ପଚାରିଛି। ମାଲିକ କହିଛନ୍ତି, ଏହା ଅସଲି ନୁହେଁ, ନକଲି ସୁନା।
ଅନ୍ୟପକ୍ଷରେ ବାଲୁ କହିଛନ୍ତି, ମୋ’ ସ୍ତ୍ରୀଙ୍କୁ ଏକ ହାର ଉପହାର ଦେବାକୁ ମୁଁ ଚାହୁଁଥିଲି। ତେଣୁ ତାଙ୍କ ପାଇଁ ୩୮୦୦୦ ଟଙ୍କାରେ ଏକ କିଲୋ ଓଜନର ଏକ ନକଲି ହାର ତିଆରି କରିଥିଲି। ଯାହାକୁ ମୋ’ ସ୍ତ୍ରୀ ଆମ ବିବାହ ବାର୍ଷିକୀରେ ପିନ୍ଧିଥିଲେ। ସୋସିଆଲ ମିଡିଆରେ ଭିଡିଓ ଭାଇରାଲ ହେବା ପରେ ପୋଲିସ ମୋତେ ଥାନାକୁ ଡାକିଥିଲା। ମୁଁ ଏ ବିଷୟରେ ସମସ୍ତ ସତ୍ୟାସତ୍ୟ କହିଛି।