ଭୁବନେଶ୍ୱର,୨୨ା୧୨(ସତ୍ୟଜିତ୍ ରାଉତ): ସମ୍ପର୍କରେ ବିଷ ଦେଲେ ଯୁବକ। ମହିଳାଙ୍କ ଆପତ୍ତିଜନକ ଫଟୋ ଓ ଭିଡିଓ ଭାଇରାଲ କରିବାର ଧମକ ଦେବା ସହ ବ୍ଲାକମେଲ୍ କରି ନେଇଗଲେ ୪.୯୬ ଲକ୍ଷ। ତେବେ ଅଧିକ ଟଙ୍କା ନ ପାଇବାରୁ ତାଙ୍କ ଫଟୋ ଓ ଭିଡିଓ ଭାଇରାଲ କରିଦେଲେ। ଏହି ମାମଲାରେ ଭୁବନେଶ୍ୱର ମହିଳା ଥାନା ପୋଲିସ ସମ୍ପୃକ୍ତ ଅଭିଯୁକ୍ତ ଯୁବକଙ୍କୁ ଶନିବାର ଗିରଫ କରିଛି। ସେ ହେଲେ ଭୁବନେଶ୍ୱର ବାଲିଅନ୍ତା ଥାନା ଅନ୍ତର୍ଗତ ଭିଙ୍ଗାରପୁର ଅଞ୍ଚଳର ମନୋରଞ୍ଜନ ଖଟେଇ (୨୯)। ତାଙ୍କଠାରୁ ସିମ୍ କାର୍ଡ ସମେତ ଅଶ୍ଳୀଳ ଫଟୋ ଓ ଭିଡିଓ ଥିବା ମୋବାଇଲ ଜବତ ହୋଇଛି। ଅଭିଯୁକ୍ତ ମନୋରଞ୍ଜନଙ୍କୁ କୋର୍ଟଚାଲାଣ କରାଯାଇଥିଲା। ଜାମିନ ନାମଞ୍ଜୁର ପରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ମାମଲା ଅନୁଯାୟୀ, ମନୋରଞ୍ଜନ ଏକ କୋରିଅର୍ ସଂସ୍ଥାରେ କାମ କରନ୍ତି। ପୀଡିତା ଜଣକ ମନୋରଞ୍ଜନଙ୍କ ଦୂର ସମ୍ପର୍କୀୟ ହୋଇଥିବାବେଳେ ସ୍ଥାନୀୟ ଅଞ୍ଚଳରେ ରହି ଏକ ଘରୋଇ ସଂସ୍ଥାରେ କାମ କରନ୍ତି। ତେଣୁ ଉଭୟଙ୍କ ମଧ୍ୟରେ ଭଲ ବନ୍ଧୁତା ଥିଲା। ଏହାର ଫାଇଦା ଉଠାଇ ପୀଡ଼ିତାଙ୍କ ଅଜାଣତରେ ତାଙ୍କର କିଛି ଆପତ୍ତିଜନକ ଫଟୋ ଓ ଭିଡିଓକୁ ମନୋରଞ୍ଜନ ନିଜ ପାଖରେ ରଖିଥିଲେ। ତେବେ କିଛିମାସ ତଳେ ଉକ୍ତ ଫଟୋ ଏବଂ ଭିଡିଓକୁ ଭାଇରାଲ୍ କରିବାର ଧମକ ଦେଇ ମହିଳାଙ୍କୁ ଟଙ୍କା ମାଗିଥିଲେ ମନୋରଞ୍ଜନ। ଫଳରେ ବିଭିନ୍ନ ପର୍ଯ୍ୟାୟରେ ପୀଡିତା ଜଣକ ତାଙ୍କୁ ୟୁପିଆଇ ଜରିଆରେ ୯୬ ହଜାର ୫୦୦ ଟଙ୍କା ଓ ନଗଦ ଆକାରରେ ୪ ଲକ୍ଷ ଟଙ୍କା ଦେଇଥିଲେ। ଏହାପରେ ବି ମନୋରଞ୍ଜନ ବାରମ୍ବାର ଧମକ ଦେଇ ଟଙ୍କା ମାଗିଥିଲେ। ହେଲେ ମହିଳା ଜଣକ ଟଙ୍କା ଦେବାକୁ ମନା କରିଦେବାରୁ କିଛିଦିନ ତଳେ ମନୋରଞ୍ଜନ ଫଟୋ ଓ ଭିଡିଓକୁ ପୀଡିତାଙ୍କ ପରିବାର ଲୋକଙ୍କୁ ଶେୟାର କରିବା ସହ ନାନା ଧମକ ଦେଇଥିଲେ। ଏନେଇ ପୀଡିତାଙ୍କ ଏତଲାକ୍ରମେ ମହିଳା ଥାନା ପୋଲିସ ଡିସେମ୍ବର ୧୩ରେ ଏକ ମାମଲା (ନଂ.୨୦୬/୨୦୨୪) ରୁଜୁ କରିଥିଲା। ତେବେ ଏହି ମାମଲାରେ ମନୋରଞ୍ଜନଙ୍କର ଜଣେ ବନ୍ଧୁଙ୍କ ସମ୍ପୃକ୍ତି ଥିବା ଜଣାପଡ଼ିବାରୁ ତାଙ୍କୁ ଧରିବାକୁ ପୋଲିସ ପ୍ରୟାସ କରୁଛି। ମନୋରଞ୍ଜନଙ୍କ ନାଁରେ ବାଲିଅନ୍ତା ଥାନାରେ ଏକ ଆପରାଧିକ ମାମଲା ରହିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି।
