ଭୁବନେଶ୍ୱର,୧୦।୧୧: ବାଲେଶ୍ୱର ନୀଳଗିରି ଲଜ୍ଜାକୁ ନେଇ ବଜେଡି ନେତ୍ରୀ ଲେଖାଶ୍ରୀ ସାମନ୍ତସିଂହାର ଭାଜପା ଉପରେ ବର୍ଷିଛନ୍ତି । ପ୍ରେସମିଟ୍ କରି ସେ ଭାଜପା ସରକାରଙ୍କୁ ଟାର୍ଗେଟ କରିଛନ୍ତି। ଗତ ୭ ତାରିଖରେ ନୀଳଗିରି ନିର୍ବାଚନମଣ୍ଡଳୀର ଧୋବଶିଳାଠାରେ ଜଣେ ଆଦିବାସୀ ମହିଳା ବଳାତ୍କାର ଶିକାର ହୋଇଥିଲେ। ମହିଳା ଜଣଙ୍କ ରାତିରେ ଶୋଇଥିବାବେଳେ ଜଣେ ଦୁର୍ବୃତ୍ତ ଘରେ ପଶି ମହିଳାଙ୍କୁ ବଳାତ୍କାର କରିଥିଲା ।
ତେବେ ଧୋବଶିଳା ହେଉଛି ଭାଜପା ଏମ୍ପି ପ୍ରତାପ ଷଡ଼ଙ୍ଗୀଙ୍କ ପଞ୍ଚାୟତ। ତେବେ ସେ କହିଛନ୍ତି ଏମ୍ପିଙ୍କ ପଞ୍ଚାୟତରେ ମହିଳା ସୁରକ୍ଷିତ ନାହାଁନ୍ତି। ଏ ନେଇ ସେ ସିଧାସଳଖ ଭାଜପାକୁ ଟାର୍ଗେଟ କରିଛନ୍ତି ।
ସୂଚନାଯୋଗ୍ୟ, ମହିଳାଙ୍କ ସ୍ବାମୀ ଘରେ ନ ଥିବାବେଳେ ଅଭିଯୁକ୍ତ ଆକାଶ ବିନ୍ଧାଣି ମହିଳାଙ୍କୁ ଛୁରି ଦେଖାଇ ବଳାତ୍କାର କରିଥିଲେ । ଏ ନେଇ ୯ ତାରିଖ ଦିନ ପୀଡିତା ଜଣଙ୍କ ଥାନରେ ଏତଲା ଦେଲା ପରେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଇ ନ ଥିଲା । ଯାହା ଅତ୍ୟନ୍ତ ନିନ୍ଦନୀୟ ବୋଲି ଲେଖାଶ୍ରୀ କହିଛନ୍ତି ।
ଲେଖାଶ୍ରୀ ଅଭିଯୋଗ ଆଣି କହିଛନ୍ତି ଯେ, ଆକାଶ ବିନ୍ଧାଣି ଭାରତୀୟ ଜନତା ପାର୍ଟିର ଜଣେ କର୍ମୀ । ଯେଉଥିପାଇଁ ଏହି ଘଟଣାକୁ ଚାପି ଦେବା ପାଇଁ ପୋଲିସ ଉପରେ ଚାପ ବି ଥାଇପାରେ। ଜାଣିଶୁଣି ପୋଲିସ ଏ ଘଟଣାରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନି ।
ଅନ୍ୟପକ୍ଷେ ସେ ନାରୀଙ୍କୁ ସମ୍ନାନ ଦେବା କଥା କହୁଥିବା ଏମ୍ପି ଘଟଣାରେ ସମ୍ପୂର୍ଣ୍ଣ ନିରବ ହୋଇ ଦୋଷୀକୁ ଆଶ୍ରୟ ଦେଉଛନ୍ତି ବୋଲି ଲେଖାଶ୍ରୀ କହିଛନ୍ତି । ତେବେ ସେଠାକାର ସ୍ଥାନୀୟ ବିଜେଡି ନେତା ସୁକାନ୍ତ କୁମାର ନାୟକ ପୀଡିତାଙ୍କ ଘରକୁ ଯାଇ ତାଙ୍କ ସହ ଆଲୋଚନା କରିଛନ୍ତି । ଏଥିସହିତ କିପରି ପୀଡିତା ଜଣଙ୍କ ନ୍ୟାୟ ପାଇବେ ସେନେଇ ବିଜେଡି ଚେଷ୍ଟା କରୁଛି ବୋଲି ଲେଖାଶ୍ରୀ କହିଛନ୍ତି ।