ଭୁବନେଶ୍ୱର,୪।୧୨(ବ୍ୟୁରୋ): ରନ୍ଧନ ଗ୍ୟାସ୍ ଦର ବୃଦ୍ଧି ପ୍ରତିବାଦରେ ମହିଳା ବିଜେଡି ରଣହୁଙ୍କାର ଦେଇଛି। ଗ୍ୟାସ୍ ଦର ଏବଂ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଦର ଆକାଶଛୁଆଁ ହେବା ବିରୋଧରେ ମହିଳା ବିଜେଡି କର୍ମୀ ରାସ୍ତାକୁ ଓହ୍ଲାଇଥିଲେ। କେନ୍ଦ୍ର ସରକାରଙ୍କ ବିରୋଧରେ ନାରା ଦେବା ସହ ଦରଦାମ ବୃଦ୍ଧିର ଜବାବ ମଧ୍ୟ ମାଗିଥିଲେ। ବିଧାୟିକା ତଥା ବିଜୁ ମହିଳା ଜନତା ଦଳର ସଭାନେତ୍ରୀ ସ୍ନେହାଙ୍ଗିନୀ ଛୁରିଆଙ୍କ ସହିତ ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ, ପୂର୍ବତନ ମନ୍ତ୍ରୀ ଉଷା ଦେବୀ, ବିଧାୟିକା ମଞ୍ଜୁଳା ସ୍ବାଇ ପ୍ରମୁଖଙ୍କ ନେତୃତ୍ୱରେ, ଭୁବନେଶ୍ୱର ଏକାମ୍ର, ମଧ୍ୟ, ଉତ୍ତର, କଟକ-ଚୌଦ୍ୱାର, ସାଲେପୁର, ସଦର ନିର୍ବାଚନମଣ୍ଡଳୀର ଶତାଧିକ ମହିଳା ଶୁକ୍ରବାର ରାଜଭବନ ସମ୍ମୁଖରେ କେନ୍ଦ୍ର ସରକାରଙ୍କ ଜନବିରୋଧୀ ନୀତି ବିରୋଧରେ ପ୍ରତିବାଦ ପ୍ରଦର୍ଶନ କରିଛନ୍ତି। ଗତ ନଭେମ୍ବର ୧, ୨୨,୨୩ ଏବଂ ୨୪ ତାରିଖରେ ବିଜୁ ମହିଳା ଜନତା ଦଳ ସମଗ୍ର ଓଡ଼ିଶାର ବିଭିନ୍ନ ସମୁଦାୟ ପକ୍ଷରୁ ଅକୁଣ୍ଠ ସମର୍ଥନ ପ୍ରାପ୍ତ କରି କେନ୍ଦ୍ର ସରକାର ରନ୍ଧନ ଗ୍ୟାସ୍ ଏବଂ ଅନ୍ୟାନ୍ୟ ନିତ୍ୟ ବ୍ୟବହାର୍ଯ୍ୟ ସମାଗ୍ରୀଗୁଡିକର ଅହେତୁକ ଦରବୃଦ୍ଧି ବିରୋଧରେ ବିପୁଳ ଭାବେ ପ୍ରତିବାଦ ପ୍ରଦର୍ଶନ କରିଛନ୍ତି। ଯଥାଶୀଘ୍ର ଦର ହ୍ରାସ କରିବା ନିମନ୍ତେ ଦେଇଥିବା ଚେତାବନୀ ସତ୍ତ୍ବେ କୁମ୍ଭକର୍ଣ୍ଣ ନିଦ୍ରାରେ ଶୋଇଥିବା କେନ୍ଦ୍ର ଅଧିକାରୀ ଜନସାଧାରଣଙ୍କ କୌଣସି ବିଶାଦ ସମ୍ବନ୍ଧରେ ଭ୍ରୂକ୍ଷେପ ନ କରିବା ଅତ୍ୟନ୍ତ ଦୁଃଖଦାୟକ ବୋଲି ନାରୀନେତ୍ରୀମାନେ କହିଛନ୍ତି।
