ଲାଞ୍ଜିଗଡ଼,୧୬।୧(ଡି.ଏନ୍.ଏ.): ଜାନୁୟାରୀ ମାସ ନ ସରୁଣୁ କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଳକ ବନ୍ଧପାରି ଗାଁଠାରେ ପାନୀୟ ଜଳ ସଙ୍କଟ ଦେଖାଦେଇଛି। ଏହାକୁ ନେଇ ପ୍ରଶାସନ ତଥା ବିଭାଗୀୟ ଅଧିକାରୀଙ୍କୁ ବାରମ୍ବାର ଅଭିଯୋଗ ପରେ ମଧ୍ୟ କୌଣସି ପଦକ୍ଷେପ ନ ନେବାରୁ ବନ୍ଧପାରି ସହରର ବିଭିନ୍ନ ପଡ଼ାର ଶତାଧିକ ମହିଳା ଏକତ୍ରିତ ହୋଇ ସୋମବାର ସକାଳ ୬ଟାରୁ ବିଶ୍ୱନାଥପୁର-ମୂଷାନାଳ ଓ ବନ୍ଧପାରି-ଲାଞ୍ଜିଗଡ଼ ମୁଖ୍ୟ ରାସ୍ତା ଅବରୋଧକରି ଧାରଣା ଦେଇଛନ୍ତି। ହେଲେ ସରପଞ୍ଚ କିମ୍ବା କୌଣସି ପ୍ରଶାସନିକ ଅଧିକାରୀ ଘଟଣାସ୍ଥଳରେ ପହଞ୍ଚି ନ ଥିବା ଜଣାପଡ଼ିଛି।
ଆନ୍ଦୋଳନ ଯୋଗୁ ରାସ୍ତାର ଦୁଇ ପାର୍ଶ୍ୱରେ ଶତାଧିକ ଗାଡ଼ି ଅଟକି ରହିଛି। ଫଳରେ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଅନ୍ୟପକ୍ଷେ ବସୁଧା ପ୍ରକଳ୍ପ ନିର୍ମାଣ କାର୍ଯ୍ୟ ଶେଷ ହୋଇ ୪ ମାସ ହେଲାଣି। ହେଲେ ଗୋଟିଏ ଦିନ ପାଇପ୍ ଲାଇନରେ ପାଣି ଦିଆଯାଇଥିଲା। ହେଲେ ନିମ୍ନମାନର ପାଇପ୍ ଯୋଗୁ ବିଭିନ୍ନ ଜାଗାରେ ପାଇପ୍ ଫାଟିଯାଇଥିଲା। ଫଳରେ ପାନୀୟଜଳ ଯୋଗାଣକୁ ବନ୍ଦ କରିଦିଆଯାଇଛି। ପ୍ରଶାସନିକ ଅଧିକାରୀ ଘଟଣାସ୍ଥଳକୁ ନ ଆସିବା ପର୍ଯ୍ୟନ୍ତ ଧାରଣା ଜାରି ରହିବ ବୋଲି ମହିଳାମାନେ ଚେତାବନୀ ଦେଇଛନ୍ତି।