ବନ୍ତ,୨୯।୮(ଡି.ଏନ.ଏ.): ଭଦ୍ରକ ଜିଲା ବନ୍ତ ଥାନା ଅଞ୍ଚଳରେ ଜଣେ ମାନସିକ ବିକାରଗ୍ରସ୍ତ ମହିଳାଙ୍କୁ ଗଣବଳାତ୍କାର କରାଯାଇଥିବା ନେଇ ଅଭିଯୋଗ ହୋଇଛି। ଏନେଇ ବନ୍ତ ଥାନା ପୋଲିସ ଶନିବାର ଏକ ମାମଲା (ନଂ.୧୪୮/୨୧) ରୁଜୁ କରି ଘଟଣାର ତଦନ୍ତ ଚଳାଇଛି। ପୋଲିସ ଜଣେ ଅଭିଯୁକ୍ତଙ୍କୁ ଥାନାରେ ଅଟକ ରଖି ପଚରାଉଚୁରା କରୁଛି। ପୋଲିସ ଉଭୟଙ୍କ ଡାକ୍ତରୀମାଇନା କରାଯାଇଛି।
ପୀଡ଼ିତାଙ୍କ ମା’ ଅଭିଯୋଗପତ୍ରରେ ଦର୍ଶାଇଛନ୍ତି ଯେ, ମଙ୍ଗଳବାର ତାଙ୍କ ଝିଅ ଶାଶୁଘରକୁ ଯିବା ପାଇଁ ଜିଦ୍ ଧରି ଘରୁ ବାହାରି ଯାଇଥିଲେ। ସେ ତାଙ୍କ ପଛେ ପଛେ ଯାଇଥିଲେ। ଘରଠାରୁ କିଛି ବାଟ ଆସିବା ପରେ ସ୍ଥାନୀୟ ଅଞ୍ଚଳର ଜଣେ ଯୁବକ ଏକ ଗାଡ଼ିରେ ଆସି ତାଙ୍କ ଝିଅକୁ ଶାଶୁଘରେ ଛାଡ଼ି ଦେବା ପାଇଁ କହିଥିଲେ। ସେ ଯୁବକଙ୍କୁ ଚିହ୍ନି ନ ଥିବାରୁ ଝିଅକୁ ଛାଡ଼ିବା ପାଇଁ ରାଜି ହୋଇ ନ ଥିଲେ। ପରେ ଯୁବକ ଜଣଙ୍କ ସେଠାରୁ ପଳାଇଯାଇ ଥିଲେ। ହେଲେ ଯୁବକ ଜଣକ ପୁଣି ଆସି ତାଙ୍କ ଝିଅକୁ ଜବରଦସ୍ତ ଗାଡ଼ିରେ ବସାଇ ନେଇଯାଇଥିଲେ। ରାତିରେ ସମ୍ପୃକ୍ତ ଯୁବକଙ୍କ ସହ ଅନ୍ୟ ଜଣେ ଯୁବକ ମିଶି ମହିଳାଙ୍କୁ ବଳାତ୍କାର କରିଥିଲେ। ପରେ ପୀଡ଼ିତାଙ୍କୁ ଶାଶୁଘର ଗାଁ ପାଖରେ ଛାଡ଼ି ଫେରାର ହୋଇ ଯାଇଥିଲେ।