ଇନ୍ଦୋର,୧୩।୧୦: ସାରା ଦେଶରେ ଗୁରୁବାର କରଓ୍ବା ଚୌଥ ବ୍ରତ ପାଳନ କରାଯାଉଛି। ବିବାହିତା ମହିଳାମାନେ ନିଜ ସ୍ବାମୀଙ୍କ ଦୀର୍ଘାୟୁ ଆୟୁଷ ପାଇଁ ଏହି ବ୍ରତ ପାଳନ କରିଥାନ୍ତି। ଏହି ବ୍ରତ ନିର୍ଜଳା ଉପବାସ ରଖାଯାଇଥାଏ। ବ୍ରତଧାରୀମାନେ ଦିନଯାକ ଟୋପାଏ ପାଣି ମଧ୍ୟ ପିଅନ୍ତି ନାହିଁ। ରାତିରେ ଜହ୍ନକୁ ପୂଜା କରି ସାରିବା ପରେ ଉପବାସ ଭାଙ୍ଗିଥାନ୍ତି। ଇତିମଧ୍ୟରେ ମଧ୍ୟପ୍ରଦେଶ ଇନ୍ଦୋରର ସେଣ୍ଟ୍ରାଲ ଜେଲରେ ମହିଳା କଏଦୀମାନେ କରଓ୍ବା ଚୌଥ ବ୍ରତ ପାଳନ କରିଛନ୍ତି। ଜେଲରେ ଦଣ୍ଡ ଭୋଗୁଥିବା ମୁସ୍ଲିମ୍ ଦମ୍ପତିମାନେ ମଧ୍ୟ ଏଥିରେ ସାମିଲ ହୋଇଥିବା ଜଣାପଡ଼ିଛି। ସେଣ୍ଟ୍ରାଲ ଜେଲର ମ୍ୟାନେଜମେଣ୍ଟ ଦ୍ୱାରା ଏହି ବ୍ୟବସ୍ଥା କରାଯାଇଥିଲା। ଜେଲ ପରିସରରେ ଥିବା ସମୁଦାୟ ୨୦ଜଣ ଦମ୍ପତି ସାମୂହିକ ଭାବେ ପୂଜାର୍ଚ୍ଚନା କରି ଏହି ପର୍ବ ପାଳିଛନ୍ତି ବୋଲି ଜେଲର ଅଧୀକ୍ଷକ ଅଲକା ସୋନକର ସୂଚନା ଦେଇଛନ୍ତି।
