ବ୍ରହ୍ମପୁର ଅଫିସ,୨୪ା୯: ଅଧିକ ଯୌତୁକ ଦାବି ନେଇ ଜଣେ ରେଲଓ୍ବେ କର୍ମଚାରୀ ତାଙ୍କ ସ୍ତ୍ରୀଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଇଥିବା ଶୁକ୍ରବାର ସରକାରୀ ରେଳବାଇ ଥାନାରେ ଅଭିଯୋଗ ହୋଇଛି। ପୋଲିସ ଘଟଣାର ତଦନ୍ତ କରୁଛି। ସେପଟେ ସ୍ତ୍ରୀ ସ୍ବପ୍ନା ନାୟକ ସ୍ବାମୀଙ୍କ ସହିତ ରହିବା ପାଇଁ ତାଙ୍କ ସରକାରୀ ବାସଭବନ ବ୍ରହ୍ମପୁର ରେଳବାଇ କ୍ୱାର୍ଟର୍ସ ସମ୍ମୁଖରେ ଧାରଣାରେ ବସିଛନ୍ତି। ନ୍ୟାୟ ନ ମିଳିବା ଯାଏ ସେ ଧାରଣାରେ ବସିବେ ବୋଲି କହିଛନ୍ତି। ସ୍ବପ୍ନାଙ୍କ ସହିତ ଧାରଣାସ୍ଥଳରେ ସମାଜସେବୀ ପ୍ରମିଳା ତ୍ରିପାଠୀ ମଧ୍ୟ ବସିଛନ୍ତି।
୨୦୧୨ ଜାନୁୟାରୀ ୧୮ରେ ସ୍ବପ୍ନା ବୁଗୁଡା ଥାନା ଅନ୍ତର୍ଗତ କରଡ଼ାବାଡ଼ି ଗ୍ରାମର କାହ୍ନୁ ଚରଣ ନାୟକଙ୍କୁ ବିବାହ କରିଥିଲେ। ସେମାନଙ୍କର ୨ଟି ସନ୍ତାନ ଅଛନ୍ତି। ଅଧିକ ଯୌତୁକ ଦାବିରେ ସ୍ବପ୍ନାଙ୍କୁ ସ୍ବାମୀ, ନଣନ୍ଦ, ନଣନ୍ଦେଇ, ଭଣଜା ମିଶି ଅଧିକ ଯୌତୁକ ଆଣିବାକୁ ଚାପ ପକାଉଥିଲେ। ଏପରିକି ୨୦୧୮ରେ ସେମାନେ ଘରୁ ତଡି ଦେବାରୁ ସ୍ବପ୍ନା ଆସି ବାପ ଘରେ ରହୁଛନ୍ତି। ନ୍ୟାୟ ଦାବିରେ ଶୁକ୍ରବାର ଜିଆରପି ଥାନାରେ ଅଭିଯୋଗ କରିଥବଲେ। ଏ ନେଇ ନଂ.୭୨/୨୨ରେ ମାମଲା ରୁଜୁ ହୋଇଛି।
