ଭୋପାଳ, ୧୨।୧ : ନମୁନା ପରୀକ୍ଷା କରାଯାଇ କରୋନା ପଜିଟିଭ୍ ଅବା ନେଗେଟିଭ୍ ରିପୋର୍ଟ ପ୍ରଦାନ କରାଯାଇଥାଏ। ତେବେ ମଧ୍ୟପ୍ରଦେଶର ଛତ୍ରପୁର ଜିଲାରେ ସ୍ବାସ୍ଥ୍ୟ ବିଭାଗର ଏକ ଅବହେଳା ସାମ୍ନାକୁ ଆସିଛି। ଯାହା ସ୍ବାସ୍ଥ୍ୟ ବିଭାଗର କାର୍ଯ୍ୟକାରିତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଛତ୍ରପୁର ଜିଲାର ଗୌରୀ ହାରରେ ରହୁଥିବା ୬୦ ବର୍ଷୀୟ ରାମପ୍ୟାରୀ ପଟେଲଙ୍କୁ କରୋନା ପଜିଟିଭ ବୋଲି ଘୋଷଣା କରାଯାଇ ତାଙ୍କ ଘରକୁ କଣ୍ଟେନମେଣ୍ଟ ଜୋନ ଭାବରେ ଘୋଷଣା କରାଯାଇଥିଲା। କଣ୍ଟେନମେଣ୍ଟ ଏରିଆର ପୋଷ୍ଟର ଘର ବାହାରେ ଏବଂ ଚାରିପାଖରେ ମରା ଯାଇଥିଲା।
ବୃଦ୍ଧ ମହିଳା ରାମପ୍ୟାରୀ ପଟେଲ କହିଛନ୍ତି ଯେ ଗତ ୫ ମାସ ହେଲା ସେ ଡାକ୍ତରଖାନା ଯାଇ ନାହାଁନ୍ତି କିମ୍ବା କୌଣସି ପ୍ରକାରର ନମୁନା ପରୀକ୍ଷା ମଧ୍ୟ କରିନାହାଁନ୍ତି। ଅପରପକ୍ଷେ, ସ୍ବାସ୍ଥ୍ୟ ବିଭାଗର ସରକାରୀ ରିପୋର୍ଟ ଅନୁସାରେ ରାମପ୍ୟାରୀ ପଟେଲ ଜାନୁୟାରୀ ୫ରେ ଗୌରୀ ହାର ସ୍ବାସ୍ଥ୍ୟ କେନ୍ଦ୍ରରେ ପହଞ୍ଚି କରୋନା ପାଇଁ ପରୀକ୍ଷା କରିଛନ୍ତି। ରିପୋର୍ଟ ପଜିଟିଭ୍ ଆସିବା ପରେ ତାଙ୍କ ଘରକୁ କଣ୍ଟେନମେଣ୍ଟ ଜୋନ ଭାବରେ ଘୋଷଣା କରାଯାଇଛି।
ବୃଦ୍ଧ ମହିଳା କୁହନ୍ତି ସେ ଦେଖିଲେ ଯେ ଲୋକମାନେ ତାଙ୍କ ସହ କଥାବାର୍ତ୍ତା ବନ୍ଦ କରି ଦେଇଛନ୍ତି। ତାଙ୍କ ନିକଟକୁ କେହି ଆସୁନାହାଁନ୍ତି। ଘର ବାହାରେ କିଛି ପୋଷ୍ଟର ଲଗାଯାଇଛି। ଲୋକଙ୍କୁ ପଚାରିବା ପରେ, ସେ ଜାଣିଲି ଯେ ତାଙ୍କର କିଛି ରୋଗ ହୋଇଛି, ଯାହାକୁ କରୋନା କୁହାଯାଉଛି।
ରାମପ୍ୟାରୀ ୫ ମାସ ପୂର୍ବରୁ ଆଖି ଚଷମା ପାଇଁ ଡାକ୍ତରଖାନା ଯାଇଥିଲେ। ଏହାପରେ ସେ କୌଣସି ପ୍ରକାର ଅସୁସ୍ଥ ହୋଇ ନାହାଁନ୍ତି କିମ୍ବା ଆଉ ଡାକ୍ତରଖାନା ଯାଇ ନାହାଁନ୍ତି।
ଗୌରୀହାର ବ୍ଲକର ବ୍ଲକ ମେଡିକାଲ ଅଫିସର ଡ. ଏସ.ପ୍ରଜାପତି ଏହା ଜାଣିବା ପରେ କର୍ମଚାରୀଙ୍କୁ ତାଗିଦ କରିବା ସହିତ ତଦନ୍ତ ନିର୍ଦ୍ଦେଶ ଦେଇଛନ୍ତି। କେଉଁଠାରେ ଏବଂ କାହା ଦ୍ୱାରା ଏପରି ଅବହେଳା କରାଯାଇଛି, ଯାଞ୍ଚ୍ ପରେ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
