ନୂଆଦିଲ୍ଲୀ,୧୭।୭ : ମହିଳା ସୁରକ୍ଷା ଏବଂ ଅଧିକାର ସହ ଜଡିତ ସମସ୍ୟାର ସମାଧାନ ପାଇଁ ଗ୍ରାମ ପଞ୍ଚାୟତରେ ମହିଳା ଅଦାଲତ ଅନୁଷ୍ଠିତ ହେବ। ସାତରୁ ୧୧ ଜଣ ମହିଳା ସଦସ୍ୟଙ୍କ ଏକ ଗୋଷ୍ଠୀ, ମହିଳାମାନଙ୍କର ଅଧିକାର ଏବଂ ଆଇନ ପ୍ରଣାଳୀ ବିଷୟରେ ଜାଣି, ମଧ୍ୟସ୍ଥତା ମାଧ୍ୟମରେ ସ୍ଥାନୀୟସ୍ତରରେ ମହିଳାମାନଙ୍କୁ ବିକଳ୍ପ ସମାଧାନ ପ୍ରଦାନ କରିବାକୁ କାର୍ଯ୍ୟ କରିବେ।
କେନ୍ଦ୍ର ମହିଳା କଲ୍ୟାଣ ମନ୍ତ୍ରଣାଳୟ ନିକଟରେ ମିଶନ ଶକ୍ତିର ସଂଶୋଧିତ କାର୍ଯ୍ୟ ଯୋଜନା ଏବଂ ଗାଇଡ ଲାଇନରେ ଏହି ନୂତନ ପ୍ରକଳ୍ପ ସମ୍ପର୍କରେ ଘୋଷଣା କରିଛନ୍ତି। ମନ୍ତ୍ରଣାଳୟର କୁହାଯାଇଛି ଯେ ମିଶନ ଶକ୍ତିର ’ସମ୍ବଲ’ ସବ ସ୍କିମ ଅଧୀନରେ ଏହି ନୂତନ ପ୍ରକଳ୍ପକୁ ଅନ୍ତର୍ଭୁକ୍ତ କରାଯାଇଛି। ମହିଳାମାନଙ୍କର ସାଧାରଣସ୍ତରରେ ଉତ୍ପୀଡ଼ନ କିମ୍ବା ଅଧିକାରରେ ବାଧା ମାମଲାର ସମାଧାନ ପାଇଁ ଗ୍ରାମ ପଞ୍ଚାୟତ ସ୍ତରରେ ମହିଳାମାନଙ୍କୁ ଏକ ବିକଳ୍ପ ଅଭିଯୋଗ ସମାଧାନ ବ୍ୟବସ୍ଥା ପ୍ରଦାନ କରିବାକୁ ସରକାର ନିଷ୍ପତ୍ତି ନେଇଛନ୍ତି।
ଏହା ପର୍ଯ୍ୟାୟକ୍ରମେ କାର୍ଯ୍ୟକାରୀ ହେବ। ପ୍ରାରମ୍ଭରେ, ଏହା କେତେକ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ଆରମ୍ଭ ହେବ। ନିର୍ବାଚିତ ମହିଳା ଗ୍ରାମ ମୁଖ୍ୟଙ୍କ ଦ୍ୱାରା ଜିଲାର କେତେକ ଗ୍ରାମ ପଞ୍ଚାୟତରେ ପ୍ରଥମେ ଏହା କାର୍ଯ୍ୟକାରୀ ହେବ ।
ପ୍ରଥମ ବର୍ଷରେ, ୧୫ ବିଭିନ୍ନ ଯୋଜନା ଏବଂ କାର୍ଯ୍ୟକ୍ରମ ଅଧୀନରେ ଆଇନଗତ ଏବଂ ସାମ୍ବିଧାନିକ ଅଧିକାର ସମ୍ପର୍କରେ ସଚେତନତା ଅଭିଯାନ ଅନୁଷ୍ଠିତ ହେବ। ଦ୍ୱିତୀୟ ବର୍ଷରେ, ପ୍ରତିବଦ୍ଧ ତଥା ସାମାଜିକ ସମ୍ମାନିତ ମହିଳାମାନଙ୍କୁ ଚିହ୍ନଟ କରାଯିବ। ମହିଳାମାନଙ୍କ ସହ ଜଡିତ ଆଇନ ଏବଂ ଯୋଜନା ବିଷୟରେ ସେମାନଙ୍କୁ ବ୍ୟାପକ ତାଲିମ ଦିଆଯିବ। ଏଥିମଧ୍ୟରୁ ମନୋନୀତ ହୋଇଥିବା ସାତରୁ ୧୧ ଜଣ ସଦସ୍ୟ ବିଶିଷ୍ଟ ମହିଳା ଗୋଷ୍ଠୀ ସାମାଜିକ, ଅର୍ଥନୈତିକ ଏବଂ ସାଂସ୍କୃତିକ ସମସ୍ୟାର ସମ୍ମୁଖୀନ ହେଉଥିବା ମହିଳାମାନଙ୍କୁ ମଧ୍ୟସ୍ଥତା ମାଧ୍ୟମରେ ବିକଳ୍ପ ସମାଧାନ ପ୍ରଦାନ କରିବେ। ମନ୍ତ୍ରଣାଳୟର ଯୁଗ୍ମ ସଚିବ ଡ. ରାକେଶ ଗୁପ୍ତା ରାଜ୍ୟମାନଙ୍କୁ ଏନେଇ ନିର୍ଦ୍ଦେଶନାମା ଜାରି କରିଛନ୍ତି।
ମହିଳା ଅଦାଲତ ପାଇଁ ମନୋନୀତ ସଦସ୍ୟମାନଙ୍କୁ କୌଣସି ପାରିଶ୍ରମିକ ଦିଆଯିବ ନାହିଁ। କିନ୍ତୁ, ବୈଠକ ଅନୁଷ୍ଠିତ ହେଲେ ସେମାନଙ୍କୁ ପକେଟ ଖର୍ଚ୍ଚ ମିଳିବ। ସଦସ୍ୟମାନଙ୍କୁ ବ୍ୟାଜ ଏବଂ ୟୁନିଫର୍ମ ପାଇଁ ମଧ୍ୟ ଟଙ୍କା ଦିଆଯିବ। ପ୍ରତି ବୈଠକରେ ପକେଟ ଖଚ୍ଚ ପାଇଁ ୩୦୦୦ ଟଙ୍କା ଏବଂ ଦୁଇ ବର୍ଷରେ ଥରେ ୟୁନିଫର୍ମ ପାଇଁ ୮୦୦ ଟଙ୍କା ଦିଆଯିବ।
ଷ୍ସଚେତନତା ସୃଷ୍ଟି କରିବା, ଯୋଜନାଗୁଡିକର ଉନ୍ନତି ପାଇଁ ମତାମତ ସଂଗ୍ରହ କରିବା ଏବଂ ସେବାଗୁଡିକର ପ୍ରଭାବଶାଳୀ ଜନସାଧାରଣ ବିତରଣ ପାଇଁ ଜନସାଧାରଣଙ୍କ ସହ ଜଡିତ ହେବା ପାଇଁ ମହିଳା ଅଦାଲତକୁ ମଧ୍ୟ ବ୍ୟବହାର କରାଯିବ। ପଞ୍ଚାୟତିରାଜ ମନ୍ତ୍ରଣାଳୟ, ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ଏବଂ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଦ୍ୱାରା ପରିଚାଳିତ ସାଧାରଣ ସେବା କେନ୍ଦ୍ର ଦ୍ୱାରା ଗ୍ରାମ ପଞ୍ଚାୟତ ମାଧ୍ୟମରେ ମହିଳା ଅଦାଲତଙ୍କୁ ସହାୟତା ଯୋଗାଇ ଦିଆଯିବ।