ଜୁରିଚ୍, ୨୬ା୧୨ (ଏପି)-ମହିଳା ଫିଫା ବିଶ୍ୱକପ ୨୦୨୩ର ଅଂଶଗ୍ରହଣକାରୀ ଦଳ ସଂଖ୍ୟା ୩୨କୁ ବୃଦ୍ଧି କରାଯାଇଛି। ଫଳରେ ଦି କନଫେଡେରେଶନ ଅଫ୍ ନର୍ଥ ସେଣ୍ଟ୍ରାଲ ଆମେରିକା, କାରିବିୟନ ଆସୋସିଏଶନ ଫୁଟ୍ବଲ (କନ୍କାକାଫ୍)ର ୪ଟି ଦଳ ସିଧାସଳଖ ଯୋଗ୍ୟତା ହାସଲ କରିବେ। ୧୦ ଦଳକୁ ନେଇ ହେବାକୁଥିବା ପ୍ଲେଅଫ୍ ଟୁର୍ନାମେଣ୍ଟ ଜରିଆରେ ଏହି ଅଞ୍ଚଳରୁ ଅନ୍ୟ ଦୁଇଟି ଦଳ ଯୋଗ୍ୟତା ହାସଲ କରିବେ। ଗତବର୍ଷ ଫ୍ରାନ୍ସରେ ୨୪ଟି ଦଳକୁ ନେଇ ବିଶ୍ୱକପ ଅନୁଷ୍ଠିତ ହୋଇଥିଲା। ନର୍ଥ ଓ ସେଣ୍ଟ୍ରାଲ ଆମେରିକା ଏବଂ କାରିବିୟନକୁ ନେଇ ଗଠିତ କନ୍ଫେଡେରେଶନରୁ ଯୁକ୍ତରାଷ୍ଟ୍ର ଆମେରିକା, କାନାଡା ଓ ଜାମାଇକା ଆଦି ପ୍ରତିନିଧିତ୍ୱ କରିଥିଲେ। କନ୍କାକାଫ୍ରୁ ଚତୁର୍ଥ ଦଳ ଭାବେ ପାନାମା ପାଇଁ ସୁଯୋଗ ଥିଲା। ମାତ୍ର କନ୍କାକାଫ୍-କନ୍ମେବୋଲ୍ ପ୍ଲେ-ଅଫ୍ରେ ହୋମ୍ ଓ ଆଓ୍ବେ ଏଗ୍ରିଗେଟ୍ରେ ଦଳ ଆର୍ଜେଣ୍ଟିନା ନିକଟରୁ ୫-୧ରେ ପରାଜିତ ହୋଇଯାଇଥିଲା। ଫିଫା ମହିଳା ବିଶ୍ୱକପ ୩୨ଟି ଦଳକୁ ନେଇ କରିବା ଲାଗି ଫିଫା ଗୁରୁବାର ବିଧିବଦ୍ଧ ଘୋଷଣା କରିଥିଲା। ୟୁରୋପ (ୟୁଫା)ରୁ ୧୧ଟି ଦଳ, ଏସିଆ (ଏଏଫ୍ସି)ରୁ ୬, କନ୍କାକାଫ୍ ଭଳି ଆଫ୍ରିକା (କାଫ୍)ରୁ ୪, ଦକ୍ଷିଣ ଆମେରିକା (କନ୍ମେବୋଲ)ରୁ ୩ ଏବଂ ଓସେନିଆ (ଓଏଫ୍ସି)ରୁ ଗୋଟିଏ ଦଳ ସିଧାସଳଖ ଯୋଗ୍ୟତା ହାସଲ କରିବେ। ଆୟୋଜକ ହିସାବରେ ଉଭୟ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ସେମାନଙ୍କ କନ୍ଫେଡେରେଶନ ପାଇଁ ରହିଥିବା କୋଟାରୁ ସ୍ବାଭାବିକ ଯୋଗ୍ୟତା ଅର୍ଜନ କରିବେ। ସୂଚନାଯୋଗ୍ୟ, ପ୍ରଥମ ମହିଳା ବିଶ୍ୱକପ ୧୯୯୧ରେ ଚାଇନାରେ ହୋଇଥିଲା। ଏଥିରେ ୧୨ଟି ଦଳ ଭାଗ ନେଇଥିଲେ।