ବସ୍ତା, ୧୬।୫(ଡି.ଏନ.ଏ.): ନିଜର ବଦାନ୍ୟତା ପାଇଁ ବାଲେଶ୍ୱର ଜିଲା ବସ୍ତା ବ୍ଲକ ସଦାନନ୍ଦପୁର ଗ୍ରାମର ସୁପ୍ରଭା ପଣ୍ଡା (୭୦) ସମଗ୍ର ରାଜ୍ୟରେ ଚର୍ଚ୍ଚାର ପରିସରକୁ ଆସିଛନ୍ତି। ସେ ତାଙ୍କ ସ୍ବାମୀଙ୍କ ଶେଷ ଇଛା ପୂରଣ କରିବାକୁ ଯାଇ ପୁରୀ ଶ୍ରୀମନ୍ଦିରକୁ ୨୦ଲକ୍ଷ ଓ ନିଜ ଗଁା ବିଦ୍ୟାଳୟକୁ ୧୫ ଲକ୍ଷ ଟଙ୍କା ଦାନ କରିଛନ୍ତି।
ଗ୍ରାମର ସୁପ୍ରଭା ବାଲେଶ୍ୱରର ପଙ୍କଜକାନ୍ତ ପଣ୍ଡାଙ୍କୁ ବିବାହ କରିଥିଲେ। ପଙ୍କଜ ଓଡ଼ିଶା ସରକାରଙ୍କ ସେଲ୍ଟ୍ୟାକ୍ସ ଅଫିସର ଭାବେ କାର୍ଯ୍ୟ କରି ଅବସର ଗ୍ରହଣ କରିଥିଲେ। ନିଜର ସନ୍ତାନସନ୍ତତି ନ ଥିବାରୁ ପଙ୍କଜ କିଛି ସମ୍ପତ୍ତି ଦାନ କରିବାକୁ ଇଚ୍ଛା ରଖିଥିଲେ। ୨୦୨୧ରେ କ୍ୟାନସରରେ ତାଙ୍କର ମୃତ୍ୟୁ ହୋଇଥିଲା। ମୃତ୍ୟୁ ପରେ ଏହି ଇଚ୍ଛାକୁ ପୂରଣ କରିବା ଲକ୍ଷ୍ୟରେ କୋଭିଡ୍ ଗାଇଡ୍ଲାଇନ୍ କୋହଳ ହେବା ପରେ ସୁପ୍ରଭା କଟକରେ ଥିବା ଏକ ଜମିକୁ ବିକ୍ରି କରି ୨୦ଲକ୍ଷ ଟଙ୍କା ପୁରୀ ଶ୍ରୀମନ୍ଦିର ବଡ଼ ଠାକୁରଙ୍କୁ ଦାନ କରିଛନ୍ତି। ଏହି ସମୟରେ ତାଙ୍କର ଭାଉଜ ଗୀତାରାଣୀ ଶତପଥି ଏବଂ ପୁତୁରା ଚିନ୍ମୟ କୁମାର ଶତପଥି ଉପସ୍ଥିତ ଥିଲେ। କିଛିଦିନ ପୂର୍ବରୁ ବସ୍ତା ସ୍ଥିତ ଶମ୍ଭୁନାଥ ସରକାରୀ ବିଦ୍ୟାଳୟକୁ ସୁପ୍ରଭା ୧୫ଲକ୍ଷ ଟଙ୍କା ଦାନ କରିଥିଲେ। ସ୍ବାମୀଙ୍କ ଶେଷ ଇଚ୍ଛା ପୂରଣ କରିପାରିଥିବାରୁ ସେ ନିଜକୁ ଗୌରବାନ୍ବିତ ମନେ କରିଛନ୍ତି।