ବୁଏନ୍ସ ଏୟାର୍ସ, ୨ା୨ (ପି.ଟି.)- ଭାରତୀୟ ସିନିୟର ମହିଳା ହକି ଦଳ ବିଶ୍ୱର ୨ ନମ୍ବର ର଼୍ୟାଙ୍କିଙ୍ଗପ୍ରାପ୍ତ ଆର୍ଜେଣ୍ଟିନା ବିପକ୍ଷ ମ୍ୟାଚ ୧-୧ ଗୋଲ୍ରେ ଡ୍ର ରଖିଛି। ଏଥିସହିତ ଦଳର ଆର୍ଜେଣ୍ଟିନା ଟୁର୍ ଶେଷ ହୋଇଛି। ଭାରତ ତରଫରୁ ଅଧିନାୟିକା ରାଣୀ ୩୫ତମ ମିନିଟ୍ରେ ଗୋଲ ସ୍କୋର କରିଥିବା ବେଳେ ଘରୋଇ ଦଳ ପକ୍ଷରୁ ଏମିଲିଆ ଫର୍ଚେରିଓ (୫୫ତମ ମିନିଟ) ଏକ ପେନାଲ୍ଟି ଷ୍ଟ୍ରୋକ୍ ଜରିଆରେ ଗୋଲ ଦେଇଥିଲେ। ଭାରତର ଏହାଥିଲା ଚତୁର୍ଥ ମ୍ୟାଚ। ବର୍ଷା ଯୋଗୁ ଶନିବାର ତୃତୀୟ ମ୍ୟାଚ ଖେଳାଯାଇପାରି ନ ଥିଲା। ଟୁର୍ର ପ୍ରାରମ୍ଭରେ ଭାରତ ଆର୍ଜେଣ୍ଟିନାର ଜୁନିୟର ଦଳ ବିପକ୍ଷ ଦୁଇଟି ମ୍ୟାଚ ଯଥାକ୍ରମେ ୨-୨, ୧-୧ ଗୋଲରେ ଡ୍ର ରଖି୍ତ୍ଥିଲା ଏବଂ ଆର୍ଜେଣ୍ଟିନା ‘ବି’ ଟିମ୍ଠାରୁ ୧-୨, ୨-୩ ଗୋଲରେ ପରାସ୍ତ ହୋଇଥିଲା। ପରେ ଆର୍ଜେଣ୍ଟିନା ସିନିୟର ଦଳ ବିପକ୍ଷ ପ୍ରଥମ ଓ ଦ୍ୱିତୀୟ ମ୍ୟାଚ ୨-୩ ଓ ୦-୨ ଗୋଲରେ ହାରିଯାଇଥିଲା। ଟୁର୍ର ଶେଷ ମ୍ୟାଚ ଭାରତ ଯେନତେନ ଭାବେ ଜିତିବା ଲକ୍ଷ୍ୟ ନେଇ ଖେଳିଥିଲା। ଅଭିଜ୍ଞ କିନ୍ତୁ ଘରୋଇ ଦଳ ପ୍ରାଧାନ୍ୟ ବିସ୍ତାର କରି ଖେଳିଥିଲା। ଦଳ ଏକାଧିକ ଗୋଲ ସୁଯୋଗ ସୃଷ୍ଟି କରିଥିଲା। ଭାରତୀୟ ଗୋଲକିପର ସବିତା କିନ୍ତୁ ତାହା କରାଇ ଦେଇ ନ ଥିଲେ। ଏପରି କି ଆର୍ଜେଣ୍ଟିନା ୨୩ ଏବଂ ୨୪ ତମ ମିନିଟ୍ରେ ଲଗାତର ଦୁଇଟି ପେନାଲ୍ଟି କର୍ନର ପାଇ ମଧ୍ୟ ସଫଳ ହୋଇପାରି ନ ଥିଲା। ତୃତୀୟ କ୍ୱାର୍ଟରରେ ଭାରତ ଆକ୍ରମଣାତ୍ମକ ଆରମ୍ଭ କରିଥିଲା। ଅଧିନାୟିକା ରାଣୀଙ୍କୁ ଶେଷରେ ସୁଯୋଗ ମିଳିଥିଲା। ୩୫ତମ ମିନିଟ୍ରେ ବନ୍ଦନାଙ୍କଠାରୁ ମିଳିଥିବା ଏକ ସୁନ୍ଦର ପାସ୍କୁ ସେ ଗୋଲରେ ପରିଣତ କରି ଭାରତକୁ ୧-୦ରେ ଅଗ୍ରଣୀ କରାଇଥିଲେ। ଭାରତ ପରେ ୩୯ତମ ଓ ୫୦ତମ ମିନିଟ୍ରେ ଦୁଇଟି ସୁଯୋଗ ପାଇ ହାତଛଡ଼ା କରିଥିଲା। ଅନ୍ୟପକ୍ଷରେ ଆର୍ଜେଣ୍ଟିନା ଦଳ ବହୁବାର ଚେଷ୍ଟା ପରେ ୫୫ତମ ମିନିଟ୍ରେ ପାଇଥିବା ଏକ ପେନାଲଟି କର୍ନରକୁ ଗୋଲରେ ପରିଣତ କରିଥିଲା। ଫର୍ଚେରିଓ ଏହାକୁ ସ୍କୋର କରିଥିଲେ। ମ୍ୟାଚ ବରାବର ସ୍ଥିତିକୁ ଚାଲି ଆସିଥିଲା। ଚାପରେ ଥିବା ଭାରତ ବିପକ୍ଷରେ ଘରୋଇ ଦଳ ୫୬ତମ ଓ ୫୯ତମ ମିନିଟ୍ରେ ମଧ୍ୟ ଦୁଇଟି ପେନାଲ୍ଟି କର୍ନର ସୁଯୋଗ ପାଇ ମଧ୍ୟ କାର୍ଯ୍ୟକାରୀ କରିପାରି ନ ଥିଲା।