ବୁଏନ୍ସ ଆରିଜ, ୨୧।୧(ପି.ଟି.)- ଭାରତୀୟ ମହିଳା ହକି ଦଳ ଏକାଧିକ ପେନାଲ୍ଟି କର୍ନର ସୁଯୋଗ ହାତଛଡ଼ା କରିବା ପରେ ଅଧିନାୟିକା ରାଣୀ ରାମପାଲଙ୍କ ଗୋଲ ବଳରେ ଆର୍ଜେଣ୍ଟିନାର ଜୁନିୟର ଦଳ ବିପକ୍ଷରେ ୧-୧ ଗୋଲରେ ମ୍ୟାଚ ଡ୍ର ରଖିବାରେ ସକ୍ଷମ ହୋଇଛି। ଭାରତର ଏହା କ୍ରମାଗତ ଦ୍ୱିତୀୟ ଡ୍ର। ପୂର୍ବରୁ ଆର୍ଜେଣ୍ଟିନା ଜୁନିୟର ଦଳ ବିପକ୍ଷରେ ଭାରତ ୨-୨ ଗୋଲରେ ମ୍ୟାଚ ଅମୀମାଂସିତ ରଖିଥିଲା।
ମ୍ୟାଚ ଆରମ୍ଭରୁ ଭାରତ ଆକ୍ରମଣାତ୍ମକ ଖେଳିଥିଲା। ଫଳରେ ୧ମ ମିନିଟରେ ହିଁ ଦଳକୁ ପେନାଲ୍ଟି କର୍ନର ମିଳିଥିଲା। ମାତ୍ର ଗୁରଜିତ କୌରଙ୍କ ଶଟ୍କୁ ଆର୍ଜେଣ୍ଟିନା ଗୋଲକିପର ଅଟକାଇ ଦେଇଥିଲେ। ୫ମ ମିନିଟରେ ଆଉ ଏକ ପେନାଲ୍ଟି କର୍ନର ମିଳିଥିଲେ ହେଁ ଦୀପ୍ ଗ୍ରେସ୍ ଏକ୍କା ମାରିଥିବା ଶଟ୍ ପୋଷ୍ଟ ବାହାରେ ଚାଲି ଯାଇଥିଲା। ଏହାପରେ ଘରୋଇ ଦଳ ଲଗାତର ୩ ପୋଲ୍ଟି କର୍ନର ପାଇଥିଲା। ୧୩ତମ ମିନିଟରେ ଗୋଲ ଦେଇ ଦଳ ୧-୦ ଗୋଲରେ ଅଗ୍ରଣୀଲାଭ କରିଥିଲା। ଦ୍ୱିତୀୟ ଓ ତୃତୀୟ କ୍ୱାର୍ଟରରେ ଭାରତ ଏକାଧିକ ଥର ବଲ୍ନେଇ ପ୍ରତିପକ୍ଷ ପୋଷ୍ଟରେ ପହଞ୍ଚତ୍ଥିଲେ ହେଁ ଘରୋଇ ରକ୍ଷଣଭାଗକୁ ଭେଦକରିପାରି ନ ଥିଲା। ୩୭, ୪୩, ୪୮ ଓ ୫୮ତମ ମିନିଟରେ ଦଳ ୪ଟି ପେନାଲ୍ଟି କର୍ନର ପାଇଥିଲା। ପ୍ରଥମ ତିନୋଟି ବେକାର ଯାଇଥିବାବେଳେ ୫୮ତମ ମିନିଟରେ ନଭନୀତ କୌରଙ୍କ ପୁଶ୍କୁ ରାଣୀ ଗୋଲରେ ପରିଣତ କରି ମ୍ୟାଚକୁ ସମାନ ସ୍ତରକୁ ଆଣିଥିଲେ। ଭାରତୀୟ ଦଳର ପ୍ରଦର୍ଶନରେ ସନ୍ତୋଷ ପ୍ରକାଶ କରିଛନ୍ତି କୋଚ୍ ଜୋର୍ଡ ମାରିଜନେ। ଦଳର ପ୍ରଦର୍ଶନ ଦିନକୁ ଦିନ ଉନ୍ନତି ହେଉଛି। ଚୂଡ଼ାନ୍ତ ୧୮ ଜଣିଆ ଦଳରେ ଏକାଧିକ ଖେଳାଳିଙ୍କୁ ସୁଯୋଗ ଦିଆ ଯାଉଛି। ଫଳରେ କୋର୍ ଗ୍ରୁପ୍ ଦୃଢ଼ ହୋଇପାରିବ ବୋଲି ସେ କହିଛନ୍ତି। ଭାରତ ଚଳିତମାସ ୨୩ ତାରିଖରେ ଆର୍ଜେଣ୍ଟିନା ‘ବି’ ଟିମ୍କୁ ଭେଟିବ।
