ନୂଆଦିଲ୍ଲୀ, ୧୩ା୮: ବହୁ ପ୍ରତୀକ୍ଷିତ ମହିଳା ଆଇପିଏଲ୍ ୨୦୨୩ ମାର୍ଚ୍ଚରୁ ଖେଳାଯିବ। ଏଥିପାଇଁ ଏକ ମାସ ସମୟ ରଖାଯାଇଥିବା ବିସିସିଆଇର ଜେaଣ ବରିଷ୍ଠ କର୍ମକର୍ତ୍ତା ସୂଚନା ଦେଇଛନ୍ତି। ଫେବୃୟାରୀ ୯ରୁ ୨୬ ଦକ୍ଷିଣ ଆଫ୍ରିକାରେ ହେବାକୁଥିବା ମହିଳା ଟି୨୦ ବିଶ୍ୱକପ୍ ପରେ ଏହା ଅନୁଷ୍ଠିତ ହେବ। ବର୍ତ୍ତମାନ ଆପାତତଃ ୫ଟି ଦଳକୁ ନେଇ ମହିଳା ଆଇପିଏଲ୍ କରିବାକୁ ସ୍ଥିର କରାଯାଇଛି। ନିବେଶକଙ୍କ ଆଗ୍ରହ ବଢିଲେ ଦଳ ସଂଖ୍ୟା ୬କୁ ବୃଦ୍ଧି କରାଯାଇପାରେ। ଠିକଣା ସମୟରେ ଟିମ୍ ନିଲାମ ପ୍ରକ୍ରିୟା ସମ୍ପର୍କରେ ସୂଚନା ଦିଆଯିବ। ଉଭୟ ବିସିସିଆଇ ସଭାପତି ସୌରଭ ଗାଙ୍ଗୁଲି ଓ ସମ୍ପାଦକ ଜୟ ଶାହା ପୂର୍ବରୁ ସେମାନଙ୍କର ପୃଥକ୍ ପୃଥକ୍ ସାକ୍ଷାତ୍କାରରେ ୨୦୨୩ରେ ମହିଳା ଆଇପିଏଲ୍ ଖେଳାଯିବା ସମ୍ପର୍କରେ ସୂଚନା ଦେଇ ସାରିଛନ୍ତି। ଅନେକ ଖେଳପ୍ରେମୀଙ୍କ ମତରେ ମହିଳା ଆଇପିଏଲ୍ ହେଲେ ଦେଶରେ ମହିଳା କ୍ରିକେଟରେ ବୈପ୍ଳବିକ ପରିବର୍ତ୍ତନ ହେବ।