ଇନ୍ଦୋର,୧୮।୩ (ପି.ଟି.): ମହିଳା କ୍ରିକେଟରେ ବୁଧବାର ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଚଳିତ ସିନିୟର ମହିଳା ଦିନିକିଆ ଟ୍ରଫିରେ ନାଗାଲାଣ୍ଡ ଦଳ ମାତ୍ର ୧୭ ରନକରି ଅଲଆଉଟ ହୋଇଛି। ଜବାବରେ ମୁମ୍ବାଇ ମାତ୍ର ୪ଟି ବଲ ଖେଳି ବିନା କ୍ଷତିରେ ବିଜୟୀ ହୋଇଛି।
ଲିଗ୍ ପର୍ଯ୍ୟାୟରେ ସ୍ଥାନୀୟ ହୋଲକାର ଷ୍ଟାଡିୟମରେ ଟସ୍ ଜିତି ନାଗାଲାଣ୍ଡ ପ୍ରଥମେ ବ୍ୟାଟିଂ କରିଥିଲା। ମୁମ୍ବାଇ ଅଧିନାୟିକା ତଥା ଦ୍ରୁତ ବୋଲର ସାୟାଲି ସାତ୍ଘରେ ୮.୪ ଓଭର ବୋଲିଂ କରି ମାତ୍ର ୭ ରନ ବ୍ୟୟ କରି ୫ ଉଇକେଟ ଅକ୍ତିଆର କରିଥିଲେ। ନାଗାଲାଣ୍ଡର ପ୍ରଥମ ୪ ବ୍ୟାଟ୍ସଓମ୍ୟାନ ଖାତା ଖୋଲିପାରି ନ ଥିଲେ। ଦଳ ତରଫରୁ ୭ ନମ୍ବରରେ ବ୍ୟାଟିଂ କରିଥିବା ସାରିବା ସର୍ବାଧିକ ୯ ରନ କରିଥିଲେ। ମୁମ୍ବାଇ ତରଫରୁ ସାୟାଲି ୫, ଏସ୍ ଥାକୋର ଗୋଟିଏ ଓ ଏମ୍. ଦକ୍ଷିଣି ୨ ଉଇକେଟ ଅକ୍ତିଆର କରିଥିଲେ। ଜବାବରେ ମୁମ୍ବାଇ ଓପନର ଇଶା ଓଜା ଓ ଭୃଶାଳି ଭଗତ ୪ଟି ବଲ୍ ଖେଳି ୩ ଚୌକା ଓ ଗୋଟିଏ ଛକା ସହ ଦଳକୁ ଜିତାଇଥିଲେ।