କାବୁଲ, ୪।୪: ଆଫଗାନିସ୍ତାନରେ ମହିଳାଙ୍କ ଦ୍ୱାରା ପରିଚାଳିତ ରେଡିଓ ଷ୍ଟେଶନ୍କୁ ତାଲିବାନ ଶାସକ ବନ୍ଦ କରିଦେଇଛନ୍ତି। ରମ୍ଜାନ୍ବେଳେ ଗୀତ ବଜାଇବାରୁ ରେଡିଓ ଷ୍ଟେଶନ୍ ଉପରେ ଏପ୍ରକାର କାର୍ଯ୍ୟନୁଷ୍ଠାନ ଗ୍ରହଣ କରାଯାଇଛି। ୧୦ବର୍ଷ ପୂର୍ବେ ଏହି ରେଡିଓ ଷ୍ଟେଶନ୍ ଆରମ୍ଭ କରାଯାଇଥିଲା। ଷ୍ଟେଶନର ନାମ ‘ସଦାଇ ବାନୋଓ୍ବାନ’ ଯାହାର ଅର୍ଥ ମହିଳାଙ୍କ ସ୍ବର। ସେଠାରେ ମୋଟ ୮ ଜଣ କର୍ମଚାରୀଥିବାବେଳେ ସେମାନଙ୍କ ମଧ୍ୟରୁ ୬ ଜଣ ମହିଳା। ସରକାରଙ୍କ ନିୟମ ଉଲ୍ଲଂଘନ ଯୋଗୁ ଷ୍ଟେଶନ୍ଟିକୁ ବନ୍ଦ କରାଯାଇଛି। ତେବେ ରେଡିଓ ଷ୍ଟେଶନ୍ କର୍ତ୍ତୃପକ୍ଷ ନିଜ ଭୁଲ୍ ମାନି ଏଭଳି କାର୍ଯ୍ୟ ନ ଦୋହରାଇବା ଲାଗି ପ୍ରତିଶ୍ରୁତି ଦେଲେ କଟକଣା ହଟାଇଦିଆଯିବ ବୋଲି ସୂଚନା ଓ ସଂସ୍କୃତି ବିଭାଗ ନିର୍ଦ୍ଦେଶକ ମୋଇଜୁଦ୍ଦିନ ଅହମଦି କହିଛନ୍ତି। ଅନ୍ୟପକ୍ଷେ ରମ୍ଜାନ୍ ସମୟରେ ରେଡିଓରେ କୌଣସି ଗୀତ ବଜାଯାଇ ନାହିଁ। ଷ୍ଟେଶନ୍ ବନ୍ଦ କରିବା ପାଇଁ ତାଲିବାନୀ ସରକାର ଷଡ଼ଯନ୍ତ୍ର କରିଥିବା ରେଡିଓ ଷ୍ଟେଶନ୍ ମୁଖ୍ୟ ନାଜିଆ ସୋରୋଶ ଅଭିଯୋଗ ଆଣିଛନ୍ତି।
