ଥିରୁଭାନନ୍ତପୁରମ୍,୫।୧୧ : ମହିଳାଙ୍କ ପ୍ରଜନନ ଅଧିକାରରେ ବାଧା ଦିଆଯାଇ ପାରିବ ନାହିଁ। ଏକ ମାମଲାର ଶୁଣାଣି ସମୟରେ କେରଳ ହାଇକୋର୍ଟ ଏଭଳି ରାୟ ଦେଇଛନ୍ତି। ଏହା ସହିତ ଆବେଦନକାରୀ ୨୩ ବର୍ଷ ବୟସ୍କା ଛାତ୍ରୀଙ୍କୁ କୋର୍ଟ ୨୬ ସପ୍ତାହର ଭ୍ରୁଣର ଗର୍ଭପାତ ପାଇଁ ଅନୁମତି ଦେଇଛନ୍ତି।
କୋର୍ଟ କହିଛନ୍ତି ଯେ, ସନ୍ତାନଙ୍କୁ ଜନ୍ମଦେବା ଅବା ନଦେବା ଏହା ମହିଳାଙ୍କ ବ୍ୟକ୍ତିଗତ ମୌଳିକ ଅଧିକାର। ଆବେଦନକାରୀଙ୍କ ମେଡ଼ିକାଲ ଅନୁମତିରେ ଛାତ୍ରୀ ଜଣକ ଗୁରୁତର ମାନସିକ ଚାପଗ୍ରସ୍ତ ହେଉଛନ୍ତି। ଏହାଯୋଗୁ ତାଙ୍କର ଜୀବନ ପ୍ରତି ବିପଦ ଥିବା ଆବେଦନରେ ଉଲ୍ଲେଖ କରାଯାଇଥିଲା।
ଆବେଦନ ଅନୁସାରେ ଛାତ୍ରୀ ଜଣକ ତାଙ୍କ ସହପାଠୀଙ୍କ ସହିତ ଶାରୀରିକ ସମ୍ପର୍କ ରଖି ଅଜାଣତରେ ଗର୍ଭବତୀ ହୋଇଥିଲେ। ଛାତ୍ରୀଙ୍କଠାରେ ପଲିସିଷ୍ଟିକ୍ ଡିମ୍ବଗ୍ରନ୍ଥୀ ସମସ୍ୟା ରହିଛି। ଏହାର ବିଚାର କରି ହାଇକୋର୍ଟ ଛାତ୍ରୀଙ୍କୁ ସମ୍ବିଧାନର ଧାରା ୨୧ ଅନୁସାରେ ବ୍ୟକ୍ତିଗତ ମୌଳିକ ଅଧିକାର ଅନ୍ତର୍ଗତ ସୁରକ୍ଷିତ ଗର୍ଭପାତ ପାଇଁ ଅନୁମତି ଦେଇଛନ୍ତି।