ନୂଆଦିଲ୍ଲୀ,୨୦।୯: ଲୋକସଭାରେ ମହିଳା ସଂରକ୍ଷଣ ବିଲ ଉପରେ ବୁଧବାର ବିତର୍କରେ କଂଗ୍ରେସ ସାଂସଦ ରାହୁଲ ଗାନ୍ଧୀ ଅଂଶଗ୍ରହଣ କରିଥିଲେ। ରାହୁଲ କହିଛନ୍ତି ଯେ, ମହିଳା ସଂରକ୍ଷଣ ବିଲ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହି ବିଲ ତୁରନ୍ତ କାର୍ଯ୍ୟକାରୀ ହେବା ଉଚିତ୍। ମୁଁ ଏହି ବିଲକୁ ସମର୍ଥନ କରୁଛନ୍ତି, କିନ୍ତୁ ଓବିସି ସଂରକ୍ଷଣ ବିନା ମହିଳାଙ୍କ ସଂରକ୍ଷଣ ଅସମ୍ପୂର୍ଣ୍ଣ ରହିବ। ଏହା ଏକ ବଡ ପଦକ୍ଷେପ, କିନ୍ତୁ ମୋ ପାଇଁ ଏହା ଅସମ୍ପୂର୍ଣ୍ଣ, କାରଣ ଓବିସି ମହିଳାମାନଙ୍କ ଏକ ବଡ଼ ବିଭାଗ ପାଇଁ ସଂରକ୍ଷଣର କୌଣସି ବ୍ୟବସ୍ଥା ନାହିଁ। ଏହି ଦେଶରେ କେନ୍ଦ୍ର ସରକାରରେ ୯୦ ଜଣ ସଚିବ ଅଛନ୍ତି ଏବଂ ସେମାନଙ୍କ ମଧ୍ୟରୁ କେବଳ ତିନିଜଣ ଅନ୍ୟ ପଛୁଆ ବର୍ଗର ଏବଂ ଏହି ପାଞ୍ଚ ପ୍ରତିଶତ ଲୋକ ବଜେଟ ନିୟନ୍ତ୍ରଣ କରୁଛନ୍ତି। ଓବିସି ସମ୍ପ୍ରଦାୟ ପାଇଁ ଏହା ଏକ ଅପମାନ।
ରାହୁଲ କହିଛନ୍ତି ଯେ, ପ୍ରଶ୍ନ ହେଉଛି ଏହି ଦେଶରେ କେତେ ଓବିସି, କେତେ ଦଳିତ, କେତେ ଆଦିବାସୀ ଅଛନ୍ତି। ଏହାର ଉତ୍ତର କେବଳ ଜାତି ଜନଗଣନା ମାଧ୍ୟମରେ ମିଳିପାରିବ। ଆଜି ମହିଳା ସଂରକ୍ଷଣ ବିଲ ପାସ କର ଏବଂ କାର୍ଯ୍ୟକାରୀ କର। ସୀମା ଏବଂ ଜନଗଣନା ପାଇଁ କୌଣସି ଆବଶ୍ୟକତା ନାହିଁ। ମହିଳାମାନଙ୍କୁ ସିଧାସଳଖ ୩୩ ପ୍ରତିଶତ ସଂରକ୍ଷଣ ଦିଅନ୍ତୁ।