ଶାରଜା,୭।୧୧(ପି.ଟି.): ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ଚାଲିଥିବା ମହିଳା ଟି୨୦ କ୍ରିକେଟ ଚ୍ୟାଲେଞ୍ଜ୍ରେ ଗତଥରର ଚାମ୍ପିୟନ ସୁପରନୋଭାସ୍ ଏବେ କର ବା ମର ସ୍ଥିତିର ସମ୍ମୁଖୀନ ହୋଇଛି। ଶନିବାର ସୁପରନୋଭାସ ପ୍ରତିପକ୍ଷ ଟ୍ରେଲବ୍ଲେଜର୍ସକୁ ଭେଟିବ। ଗୁରୁବାର ଭେଲୋସିଟିକୁ ପରାସ୍ତ କରିଥିବା ଟ୍ରେଲବ୍ଲେଜର୍ସ ଆଉ ଏକ ବିଜୟ ହାସଲ କରିବା ଲକ୍ଷ୍ୟରେ ରହିଛି। ଦୁଇଟି ବିଜୟ ହାସଲ କରିବା ପରେ ଟ୍ରେଲବ୍ଲେଜର୍ସ ନଭେମ୍ବର ୯ ତାରିଖରେ ଫାଇନାଲ ଖେଳିବ। ତେବେ ଏଥିପାଇଁ ସୁପରନୋଭାସକୁ ହରାଇବାକୁ ଟ୍ରେଲବ୍ଲେଜର୍ସ ପ୍ରୟାସ କରିବ।
ଅପରପକ୍ଷରେ ସୁପରନୋଭାସ୍ ପ୍ରଥମ ମ୍ୟାଚ୍ରେ ଭେଲୋସିଟିଠାରୁ ପରାସ୍ତ ହୋଇଛି। ଆଉ ଏକ ପରାଜୟ ସୁପରନୋଭାସ୍କୁ ଟୁର୍ନାମେଣ୍ଟରୁ ବାହାର କରିଦେବାକୁ ଯଥେଷ୍ଟ ହେବ। ଭଲ ନେଟ୍ ରନ୍ ରେଟ୍ ସହ ସୁପରନୋଭାସ୍ ବିଜୟୀ ହେଲେ ସମ୍ଭବତଃ ଭେଲୋସିଟିକୁ ଏଲିମିନେଟ୍ କରିବ। କାରଣ ଭେଲୋସିଟିର ନେଟ୍ ରନ୍ ରେଟ୍ -୧.୮୬୯ ରହିଛି। ସେହିପରି ଭେଲୋସିଟି ସୁପରନୋଭାସ ପରାସ୍ତ ହେଉ ବୋଲି ଚାହିଁବ। ଏହା ହେଲେ ଭୋଲେସିଟି ଫାଇନାଲକୁ ଉଠିବ।
ଭାରତୀୟ ଟି୨୦ ଅଧିନାୟିକା ହରମନପ୍ରୀତ କୌର ଓ ଶ୍ରୀଲଙ୍କା ସ୍ପିନର ଚମାରୀ ଆଟାପାଟୁ ନିଜ ଦକ୍ଷତା ଅନୁରୂପ ପ୍ରଦର୍ଶନ କରି ସୁପରନୋଭାସକୁ ବିଜୟୀ କରାଇବାକୁ ଚେଷ୍ଟା କରିବେ। ପ୍ରଥମ ମ୍ୟାଚ୍ରେ ସୁପରନୋଭାସ ଭଲ ସ୍ଥିତିରେ ଥିଲା। ତେବେ ସୁଷମା ବର୍ମା ଓ ସୁନ ଲୁସ୍ ସୁପରନୋଭାସଠାରୁ ମ୍ୟାଚ୍ ଛଡାଇ ନେଇଥିଲେ। ଚାପରେ ବୋଲରମାନେ ଭଲ ପ୍ରଦର୍ଶନ କରି ନ ଥିବାରୁ ଏହି ଦୁଇ ବ୍ୟାଟ୍ସଓମେନ ଫାଇଦା ଉଠାଇ ଦଳକୁ ବିଜୟୀ କରାଇଥିଲେ।
ସ୍ଥାନୀୟ ଶାରଜା ପିଚ୍ ଧୀରେ ଧୀରେ ମନ୍ଥର ହୋଇଛି। ତେଣୁ ଏହି ମ୍ୟାଚ୍ରେ ସ୍ପିନରମାନେ ନିର୍ଣ୍ଣାୟକ ଭୂମିକା ଗ୍ରହଣ କରିବେ। ଏକଲେଷ୍ଟୋନ୍ ଟ୍ରେଲବ୍ଲେଜର୍ସ ପାଇଁ ପୁଣିଥରେ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବେ। ସାଥୀ ବାମହାତୀ ସ୍ପିନର ରାଜେଶ୍ୱରୀ ଗାଏକ୍ୱାଡ ଓ ଅଭିଜ୍ଞ ଝୁଲଣ ଗୋସ୍ବାମୀଙ୍କ ପ୍ରଦର୍ଶନ ଉପରେ ଦଳର ଭାଗ୍ୟ ନିର୍ଭର କରୁଛି। ଉଭୟ ସୁପରନୋଭାସ ଓ ଟ୍ରେଲବ୍ଲେଜର୍ସ ଦଳରେ କ୍ୱାଲିଟି ସ୍ପିନର ରହିଛନ୍ତି। ତେବେ ବ୍ୟାଟ୍ସଓମ୍ୟାନଙ୍କ ପ୍ରଦର୍ଶନ ଉପରେ ଦୁଇ ଦଳର ସଫଳତା ନିର୍ଭର କରୁଛି।