ଆପଣ ନିଶ୍ଚିତ ଭାବରେ ସମଗ୍ର ବିଶ୍ୱରେ ବିଭିନ୍ନ ପ୍ରକାରର ସୁନ୍ଦର ଦୃଶ୍ୟରାଜି ଦେଖିଥିବେ। ସେଠାକୁ ଯିବାକୁ ଇଚ୍ଛା ମଧ୍ୟ କରିଥିବେ। କିନ୍ତୁ ଆମ ଦେଶରେ ବି ଏମିତି କିଛି ପ୍ରାକୃତିକ ଦୃଶ୍ୟ ଅଛି, ଯାହା ବିଷୟରେ ହୁଏ ତ ଅନେକ ଲୋକ ଜାଣି ନ ଥିବେ। ଯେତେବେଳେ ସୋସିଆଲ ମିଡିଆରେ ଏଭଳି ଦୃଶ୍ୟ ଭାଇରାଲ ହୁଏ, ସେତେବେଳେ ଲୋକଙ୍କ ନଜରକୁ ଏହା ଆସେ। ଏପରି ଏକ ସୁନ୍ଦର ଜଳପ୍ରପାତର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି, ଯାହା ଅନେକଙ୍କୁ ଆକର୍ଷିତ କରୁଛି।
ଅରୁଣାଚଳ ପ୍ରଦେଶର ଦିବାଙ୍ଗ ଉପତ୍ୟକାରେ ଥିବା ସୁନ୍ଦର ଜଳପ୍ରପାତର ଭିଡିଓକୁ ମୁଖ୍ୟମନ୍ତ୍ରୀ ପେମା ଖଣ୍ଡୁ ତାଙ୍କ ଟୁଇଟରରେ ଶେୟାର କରିଛନ୍ତି। ଭିଡିଓ ଦେଖିବା ପରେ ଲୋକମାନେ ନିଜ ଦେଶର ପ୍ରାକୃତିକ ସୌନ୍ଦର୍ଯ୍ୟକୁ ବେଶ୍ ଉପଭୋଗ କରୁଛନ୍ତି।
ଏହି ଭିଡିଓ ଶେୟାର୍ କରି ସେ କ୍ୟାପଶନ ଲେଖିଛନ୍ତି, ‘ଯଦି ଆପଣ ଅନିନୀଙ୍କୁ ଯାଇ ନାହାନ୍ତି, ତେବେ ଦିବାଙ୍ଗ ଘାଟିର ପ୍ରକୃତି କୋଳରେ ରହି ନୂତନ ବର୍ଷକୁ ସ୍ବାଗତ କରନ୍ତୁ।’ ଏହି ଉପତ୍ୟକାର ପ୍ରାକୃତିକ ସୌନ୍ଦର୍ଯ୍ୟ ଏବଂ ଏଠାରେ ଥିବା ଦୃଶ୍ୟ ଆପଣଙ୍କୁ ଆକର୍ଷିତ କରିବ ବୋଲି ଲେଖିଛନ୍ତି। ଟୁଇଟର ୟୁଜରମାନେ ଜଳପ୍ରପାତର ସୌନ୍ଦର୍ଯ୍ୟ ଦେଖି ଆତ୍ମବିଭୋର ହୋଇ ଉଠିଛନ୍ତି। ୟୁଜରମାନେ ଭିଡିଓ ଦେଖିବା ପରେ ସେମାନଙ୍କ ପ୍ରତିକ୍ରିୟା ଦେଇଚାଲିଛନ୍ତି। ଜଣେ ୟୁଜର କହିଛନ୍ତି, ଏହି ଦୃଶ୍ୟରୁ ମୋ’ ନଜର ହଟୁନି। ସେହିପରି ଅନ୍ୟ ୟୁଜରମାନେ ସୌନ୍ଦର୍ଯ୍ୟକୁ ଉପଭୋଗ କରିଛନ୍ତି।