ଯାଜପୁର ଅଫିସ୍/କଳିଙ୍ଗନଗର, ୪ା୭(ଡି.ଏନ୍.ଏ.): ଯାଜପୁର ଜିଲାରେ ଖୋଲିଥିବା ଶିଳ୍ପ କାରଖାନାଗୁଡ଼ିକରେ ନିଯୁକ୍ତିରେ ଅଣଓଡ଼ିଆଙ୍କୁ ପ୍ରାଧାନ୍ୟ ଦିଆଯାଉଥିବା ବେଳେ କ୍ରମେ ଏକ ଅଣଓଡିଆ ସଂସ୍ଥା ସ୍ଥାନୀୟ ଶ୍ରମିକଙ୍କୁ ହଇରାଣ କରୁଥିବା ଅଭିଯୋଗ ହୋଇଛି। କଳିଙ୍ଗନଗର ଟାଟା ଷ୍ଟିଲର ଜୁସକୋ (ଜାମସେଦପୁର ୟୁଟିଲିଟି ଆଣ୍ଡ ସର୍ଭିସେସ କମ୍ପାନୀ) ବା ଟିଏସ୍ୟୁଆଇଏସ (ଟାଟା ଷ୍ଟିଲ ୟୁଟିଲିଟି ଆଣ୍ଡ ଇନଫ୍ରାଷ୍ଟ୍ରକ୍ଚର ସର୍ଭିସେସ ଲିଃ) ପକ୍ଷରୁ ଦରମା ଓ ଫୁଲ ଆଣ୍ଡ ଫାଇନାଲ ମିଳି ନ ଥିବାରୁ ଶ୍ରମିକ ମହଲରେ ଉତ୍ତେଜନା ପ୍ରକାଶ ପାଇଛି। ଦରମା ନ ପାଇ ଶ୍ରମିକମାନେ ଉକ୍ତ କମ୍ପାନୀ ଜାଲରେ ଛନ୍ଦି ହୋଇ ଛଟପଟ ହେଉଥିବା ମତପ୍ରକାଶ ପାଇଛି। ଏ ନେଇ ଜୁସକୋ କମ୍ପାନୀ ସମ୍ମୁଖରେ ଶତାଧିକ ଶ୍ରମିକ ଶୁକ୍ରବାର ଏକତ୍ରିତ ହୋଇ ବକେୟା ଦରମା ଏବଂ ଫୁଲ ଆଣ୍ଡ ଫାଇନାଲ କରିବାକୁ ଦାବି କରିଥିଲେ। ଏହାବାଦ ତୁରନ୍ତ ଦାବି ପୂରଣ କରା ନ ଗଲେ ବ୍ୟାପକ ଆନ୍ଦୋଳନ କରାଯାଇ ଆଇନର ଆଶ୍ରୟ ନିଆଯିବ ବୋଲି ସେମାନେ ଚେତାବନୀ ଦେଇଥିଲେ। ଜୁସକୋ ଅଧୀନରେ କାର୍ଯ୍ୟରତ ସତ୍ୟବ୍ରତ ଦାସ, ତ୍ରିଲୋଚନ ମହାପାତ୍ର, ପୂର୍ଣ୍ଣଚନ୍ଦ୍ର ରାଉତ, ହେମାନନ୍ଦ ରାଉତ ପ୍ରମୁଖ କହିଛନ୍ତି ଶତାଧିକ ଶ୍ରମିକ ଓ କର୍ମଚାରୀଙ୍କର ପ୍ରାୟ ୨୫ ଲକ୍ଷ ଟଙ୍କା ମିଳିବା ବାକି ରହିଛି। ଦରମା ଦେବାକୁ ଏହି ସଂସ୍ଥା ଦିନ ଗଡାଇ ଚାଲିଛି। ଗତ ୧୮ ତାରିଖରୁ ସେମାନେ ଏ ସମ୍ପର୍କରେ ଜୁସକୋ କର୍ତ୍ତୃପକ୍ଷଙ୍କୁ ଲିଖିତ ଭାବେ ଜଣାଇଥିଲେ ବି କିଛି ଲାଭ ହୋଇ ନ ଥିବା କହିଛନ୍ତି। ଅନ୍ୟପକ୍ଷେ ଜୁସକୋ ତଥା ଟିଏସୟୁଆଇଏସର ପ୍ରୋଜେକ୍ଟ ହେଡ୍ ସୌମିତ୍ର ସରକାରଙ୍କୁ ପଚାରିବାରେ ଅଭିଯୋଗ ଉପରେ ତଦନ୍ତ କରାଯିବ। ଏ ନେଇ କମ୍ପାନୀର ପ୍ରଶାସକଙ୍କ ସହିତ ଆଲୋଚନା କରି ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି। ସୂଚନାଯୋଗ୍ୟ, ୨୦୧୫ରୁ ଟାଟା ଷ୍ଟିଲ କାରଖାନାର ବିଭିନ୍ନ ପରିଚାଳନା କାର୍ଯ୍ୟରେ ଜୁସକୋ ଅଂଶୀଦାର ଭାବେ ନିୟୋଜିତ ହୋଇଛି। ଜାମେସେଦପୁରର ଏହି କମ୍ପାନୀ ଜୁସକୋ କ୍ରମେ ୨୦୧୯ ଡିସେମ୍ବରରେ ଟିଏସୟୁଆଇଏସ ନାମରେ ପରିଚିତ ହୋଇଛି।
