ମହାକାଳପଡ଼ା,୧୨।୨(ଡି.ଏନ.ଏ.): ଘରକୁ ପାଇପ୍ ଯୋଗେ ପାନୀୟଜଳ ପହଞ୍ଚାଇବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ଯୋଜନାରେ ବିପୁଳ ଅର୍ଥ ଖର୍ଚ୍ଚ ହେଉଛି। ଅପରପକ୍ଷେ ଅନେକ ଅଞ୍ଚଳରେ ପାନୀୟ ଜଳ ସମସ୍ୟା ଦେଖାଦେଉଥିବା ବେଳେ ଲୋକ ପାଣି ମୁନ୍ଦେ ପାଇଁ ଡହଳ ବିକଳ ହେଉଛନ୍ତି। ଏ ନେଇ ରାଜ୍ୟ ସରକାର ପାନୀୟ ଜଳ ପ୍ରକଳ୍ପକୁ ଅନେକ ସ୍ଥାନରେ ଭିତ୍ତିଭୂମି ପାଇଁ ନୂତନ ପ୍ରକଳ୍ପ ଆରମ୍ଭ କରିଥିବା କୁହାଯାଉଛି। କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ଅଧୀନ ଉପକୂଳ ଅଞ୍ଚଳର ସ୍ଥାନୀୟ ପେଟଛେଲ୍ଲା ପଞ୍ଚାୟତର ସରୁମୁହିଁଠାରେ ୨୦୧୮ ଡିସେମ୍ବର ୮ରେ ୨୪୧ କୋଟି ଟଙ୍କା ବ୍ୟୟ ଅଟକଳରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ପାନୀୟ ଜଳ ପ୍ରକଳ୍ପ ଉଦ୍ଘାଟିତ ହୋଇଥିଲା। ତେବେ ଏହି ବୃହତ୍ ପାନୀୟ ଜଳ ପ୍ରକଳ୍ପ ନିର୍ମାଣ କାର୍ଯ୍ୟକୁ ଏକ କମ୍ପାନୀ ଠିକା ନେଇଛି। କମ୍ପାନୀ ନିର୍ମାଣ ଦାୟିତ୍ୱ ନେଇ ପରେ ଏହାକୁ ଛୋଟ ଠିକାଦାରଙ୍କୁ ଦେଇଛି। ଫଳରେ ନିର୍ମାଣ କାମରେ ନିୟୋଜିତ ହେଉଥିବା ଶ୍ରମିକ ଅସୁରକ୍ଷିତ ଭାବେ କାମ କରୁଥିବା ଅଭିଯୋଗ ହେଉଛି। ନିର୍ମାଣ କାର୍ଯ୍ୟ ଚାଲିଥିବା ବେଳେ କମ୍ପାନୀର କୌଣସି ଅଧିକାରୀ ରହୁ ନ ଥିବା ଦେଖିବାକୁ ମିଳିଛି। ଏହି ସରୁମୁହିଁ ଗାଁ ପଡିଆରେ ରବିବାର ଉଚ୍ଚ ପାଣି ଟାଙ୍କି ନିର୍ମାଣରେ ଉପରକୁ ଶ୍ରମିକମାନେ ଢଲେଇ ସାମଗ୍ରୀ ମୁଣ୍ଡରେ ମୁଣ୍ଡେଇ ନେଉଥିବା ଦେଖିବାକୁ ମିଳିଥିଲା। ହେଲେ ସେମାନେ ହେଲ୍ମେଟ ଓ ଅନ୍ୟ ସୁରକ୍ଷା ସରଞ୍ଜାମ ପିନ୍ଧି ନ ଥିବାରୁ ଏମାନଙ୍କ ଜୀବନ ପ୍ରତି ବିପଦ ରହିଛି। ସୂଚନାଯୋଗ୍ୟ ଏହି ବୃହତ୍ ଉଚ୍ଚ ପାଣି ଟାଙ୍କି କଳାଗଡ ଗାଁରେ ବର୍ଷେ ପୂର୍ବେ ନିର୍ମାଣ ହେଉଥିଲା। ଉଚ୍ଚ ପାଣି ଟାଙ୍କି ଉପରୁ ଖସି ପଡ଼ିବା ଯୋଗୁ ଜଣେ ଶ୍ରମିକଙ୍କ ମୃତ୍ୟୁ ଘଟିଥିଲା। ତେବେ ଦାୟିତ୍ୱରେ ଥିବା ଠିକା ସଂସ୍ଥାଙ୍କ ଖାମଖିଆଲ ମନୋଭାବ ପରିଲକ୍ଷିତ ହେଉଛି। ସେମାନେ ଶ୍ରମିକଙ୍କ ସୁରକ୍ଷା କଥା ଚିନ୍ତା କରୁନାହାନ୍ତି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏ ସମ୍ପର୍କରେ କେନ୍ଦ୍ରାପଡ଼ା ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ନିର୍ବାହୀ ଯନ୍ତ୍ରୀ ବସନ୍ତ ଚରଣ ନାୟକଙ୍କୁ ପଚାରିବାରେ ଶ୍ରମିକଙ୍କ ସୁରକ୍ଷା ଲାଗି ଠିକା କମ୍ପାନୀଙ୍କ ଦୃଷ୍ଟି ଆକର୍ଷଣ ସହ ଖୁବ୍ଶୀଘ୍ର ପଦକ୍ଷେପ ନିଆଯିବ ବୋଲି ସେ କହିଛନ୍ତି।
