ସାତମାଇଲ, ୩।୧(ଡି.ଏନ୍.ଏ.): ଢେଙ୍କାନାଳ ଜିଲା ହିନ୍ଦୋଳ ବ୍ଲକ ନନ୍ଦପୁର ଗ୍ରାମର ଗୋପବନ୍ଧୁ ବେହେରା। ବୟସ ମାତ୍ର ୩୮। ସ୍ତ୍ରୀ, ଦୁଇପୁଅ, ବିଧବା ମା’ଙ୍କୁ ନେଇ ତାଙ୍କ ପରିବାର। ମୁଣ୍ଡଝାଳ ତୁଣ୍ଡରେ ମାରି ଦିନସାରା ହାଡ଼ଭଙ୍ଗା ପରିଶ୍ରମ ପରେ ଯେତିକି ପାରିଶ୍ରମିକ ମିଳେ, ସେଥିରେ ବଡ଼କଷ୍ଟରେ ଚଳେ ପରିବାର। ତଥାପି ନିଜର ଅଭାବୀ ଜୀବନ ମଧ୍ୟରେ ସେ କିନ୍ତୁ ଭୁଲିନାହାନ୍ତି ପରିବେଶ ପ୍ରତି ରହିଥିବା ଦାୟିତ୍ୱ। ଦୀର୍ଘ ୧୫ ବର୍ଷ ଧରି ପ୍ରାୟ ୧୫୦୦ରୁ ଊର୍ଦ୍ଧ୍ୱ ଚାରା ଲଗାଇ ସ୍ଥାନୀୟ ଅଞ୍ଚଳରେ ଗୋପବନ୍ଧୁ ସୃଷ୍ଟି କରିଛନ୍ତି ନିଆରା ପରିଚୟ।
ଚାରା ଲଗାଇବା ନିଶା ସମ୍ପର୍କରେ ଗୋପବନ୍ଧୁ କୁହନ୍ତି, ଏବେ ଜଳବାୟୁ ଯେଉଁଭଳି ବଦଳୁଛି, ପରିବେଶ ସୁରକ୍ଷା ଦିଗରେ ଯତ୍ନବାନ ନ ହେଲେ ଆଗକୁ ବିପଦ ମାଡ଼ିଆସିବ। ଆମ ପିଲାମାନେ ହଇରାଣ ହେବେ। ସେଥିପାଇଁ ସେ ପିଲାଦିନରୁ ଗଛ ଲଗାଇବାକୁ ପଣ କରିଛନ୍ତି। ଏଥିରେ ତାଙ୍କ ମା’ଙ୍କ ପ୍ରେରଣା ବେଶ୍ କାମରେ ଆସିଛି । ଇତିମଧ୍ୟରେ ବିଭିନ୍ନ ସରକାରୀ ଶିକ୍ଷାନୁଷ୍ଠାନ, ଦେବାଳୟ, ରାସ୍ତାପାର୍ଶ୍ୱ, ଅନାବାଦୀ ଜମିରେ ପ୍ରାୟ ୨୫ ପ୍ରଜାତିର ୧୫୦୦ରୁ ଊର୍ଦ୍ଧ୍ୱ ଗଛ ଲଗାଇ ସାରିଲେଣି। ଖାଲି ସମୟରେ ସେ କୋଡ଼ି, କୋଦାଳ ଧରି ଗଛ ଲଗାନ୍ତି। ଯେପରି ଗୋରୁ ସେଗୁଡ଼ିକୁ ନ ଖାଇପାରିବେ, ତାହାର ବ୍ୟବସ୍ଥା କରନ୍ତି। ସେ ଲଗାଇଥିବା ବହୁ ଗଛ ଏବେ ବଡ଼ ହୋଇ ପଥଚାରୀଙ୍କୁ ଛାଇ ଦେଉଛି। ଆଗକୁ ଏହି ଅଭିଯାନ ଜାରି ରହିବ। ସରକାରୀସ୍ତରରେ ତାଙ୍କୁ ଚାରା ଯୋଗାଇ ଦେଲେ ସେ ଏହି କାମକୁ ଠିକ୍ ଭାବେ କରିପାରିବେ ବୋଲି ଗୋପବନ୍ଧୁ କହିଛନ୍ତି।
ମାତ୍ର ୩ୟ ଶ୍ରେଣୀଯାଏ ପଢିଥିବା ଗୋପବନ୍ଧୁଙ୍କ ଏଭଳି ନିଆରା କାର୍ଯ୍ୟ ସ୍ଥାନୀୟ ଅଞ୍ଚଳରେ ପ୍ରଶଂସା ସାଉଁଟୁଥିବାବେଳେ ଖଜୁରିଆକଟାସ୍ଥିତ ଓଡ଼ିଶା ନଲେଜ କର୍ପୋରେଶନ କମ୍ପ୍ୟୁଟର ଶିକ୍ଷାକେନ୍ଦ୍ର ଶାଖା ପରିଚାଳକ ପ୍ରଶାନ୍ତ ଜେନାମଣି ନବବର୍ଷ ଉପଲକ୍ଷେ ତାଙ୍କୁ ସମ୍ମାନିତ କରିଛନ୍ତି।
