ଭୁବନେଶ୍ୱର,୨୩ା୭(ବ୍ୟୁରୋ)-ରାଜ୍ୟ ସରକାର ସବୁ ବର୍ଗର ଶ୍ରମିକମାନଙ୍କର ଦୈନିକ ମଜୁରୀରେ ସଂଶୋଧନ କରିଛନ୍ତି। ଦରଦାମ ବୃଦ୍ଧିକୁ ଦୃଷ୍ଟିରେ ରଖି ଦୈନିକ ମହଙ୍ଗାଭତ୍ତା ଆସନ୍ତା ୬ ମାସ ପାଇଁ ବୃଦ୍ଧି କରିଛନ୍ତି। ଏ ନେଇ ରାଜ୍ୟ ଶ୍ରମ କମିଶନରଙ୍କ କାର୍ଯ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ କରାଯାଇଛି। ଶ୍ରମିକମାନଙ୍କ ଦୈନିକ ମହଙ୍ଗା ଭତ୍ତା ୫ଟାଙ୍କା ୪୦ ପଇସା ବୃଦ୍ଧି କରାଯାଇଛି। ପ୍ରକାଶିତ ବିଜ୍ଞପ୍ତି ଅନୁଯାୟୀ, ମହଙ୍ଗାଭତ୍ତାକୁ ମିଶାଇ ଅଣ କୁଶଳୀ ଶ୍ରମିକଙ୍କର ଦୈନିକ ମଜୁରୀ ୨୯୮ଟଙ୍କାରୁ ବଢି ୩୦୩.୪୦ ଟଙ୍କା ହୋଇଥିବା ବେଳେ ଅର୍ଦ୍ଧ କୁଶଳୀଙ୍କର ୩୩୮ଟଙ୍କାରୁ ୩୪୩.୪୦ ଟଙ୍କା, କୁଶଳୀଙ୍କର ୩୮୮ ଟଙ୍କାରୁ ୩୯୩.୪୦ ଏବଂ ଅତି କୁଶଳୀ ଶ୍ରମିକମାନଙ୍କ ଦୈନିକ ମଜୁରୀ ୪୪୮ଟଙ୍କାରୁ ୪୫୩. ୪୦ ଟଙ୍କାକୁ ବୃଦ୍ଧି କରାଯାଇଛି। ଏହି ବର୍ଦ୍ଧିତ ମଜୁରୀ ପିଛିଲା ଭାବେ ଏପ୍ରିଲ ପହିଲାରୁ ଲାଗୁ ହେବ।