ଆର୍.ଉଦୟଗିରି,୧୦।୧୦(ଡି.ଏନ୍.ଏ.): ଗଜପତି ଜିଲା ଅଡ଼ବା ଥାନା କଲବା ଗାଁର ଦାଦନ ଶ୍ରମିକ ଶାଙ୍କ ମୁର୍ମୁଙ୍କ ଗୋଡ଼ ହାତ କଟା ଘଟଣାର ଦୀର୍ଘଦିନ ପରେ ପୋଲିସ ଏକ ମାମଲା ରୁଜୁ କରିଛି। ଶାଙ୍କଙ୍କ ସ୍ତ୍ରୀ ସୁଶୀଳା ମୁର୍ମୁଙ୍କ ଏତଲାକୁ ଭିତ୍ତିକରି ଅଡ଼ବା ପୋଲିସ ମାମଲା (ନଂ. ୧୧୯/୨୨) ରୁଜୁକରି ତଦନ୍ତ ଆରମ୍ଭ କରିଛି। ଅଡ଼ବା ଥାନା ଅଧିକାରୀ ଆନନ୍ଦ୍ର ଚନ୍ଦ୍ର ପାତ୍ର କହିଛନ୍ତି, ଖୁବ୍ଶୀଘ୍ର ଏକ ଟିମ୍ ଉତ୍ତରପ୍ରଦେଶ ଯାଇ ଘଟଣାର ତଦନ୍ତ କରିବ। ଏପରି କି ଜିଲା ଶ୍ରମ ବିଭାଗ ଘଟଣାର ତଦନ୍ତ କରିବ ବୋଲି କହିଛନ୍ତି ଥାନା ଅଧିକାରୀ।
ଅଭିଯୋଗ ଅନୁଯାୟୀ, ଜଣେ ଦାଦନ ସର୍ଦ୍ଦାର ଶାଙ୍କଙ୍କୁ ମାସିକ ୨୦ ହଜାର ଟଙ୍କା ଦିଆଯିବ ବୋଲି କହିବା ସହ ବିଭିନ୍ନ ପ୍ରଲୋଭନ ଦେଖାଇ ତାଙ୍କୁ ଉତ୍ତରପ୍ରଦେଶର ଏକ ସିମେଣ୍ଟ କମ୍ପାନୀକୁ ନେଇଥିଲେ। ସେଠାରେ ସେ କିଛିଦିନ କାମ କରିବା ପରେ ଶାଙ୍କ ମଜୁରି ଟଙ୍କା ମାଗିଥିଲେ। ହେଲେ ତାଙ୍କୁ ଟଙ୍କା ମିଳି ନ ଥିଲା। ଏଭଳି ସ୍ଥିତିରେ ଦିନେ ତାଙ୍କୁ ଅଚେତ କରି ଦିଆଯାଇଥିଲା। ଚେତା ଫେରିବା ପରେ ତାଙ୍କର ଗୋଟିଏ ଗୋଡ଼ ଓ ପାପୁଲି କଟାହୋଇଥିବା ସେ ଜାଣିବାକୁ ପାଇଥିଲେ। ପରେ ତାଙ୍କୁ ଏକ ହସ୍ପିଟାଲରେ ଚିକିତ୍ସା କରାଯାଇ ଗାଁକୁ ପଠାଇ ଦିଆଯାଇଥିଲା। ରେଳଲାଇନରେ ପଡ଼ିଥିବା ବେଳେ ତାଙ୍କୁ ଉଦ୍ଧାରକରି ଆଣିଛୁ ବୋଲି ଶାଙ୍କଙ୍କୁ ଗ୍ରାମକୁ ଛାଡିବାକୁ ଆସିଥିବା ଯୁବକମାନେ କହିଥିଲେ। ଏନେଇ ବ୍ରହ୍ମପୁର ସାମାଜିକ କର୍ମୀ ରବୀନ୍ଦ୍ର ମିଶ୍ର ଜାତୀୟ ମାନବାଧିକାର କମିଶନ (ଏନ୍ଏଚ୍ଆର୍ସି)ଙ୍କ ଦୃଷ୍ଟି ଆକର୍ଷଣ କରିଥିଲେ। କମିଶନ ମାମଲାକୁ ଗ୍ରହଣକରି ଆସନ୍ତା ୮ ସପ୍ତାହ ମଧ୍ୟରେ ରିପୋର୍ଟ ଦେବାକୁ ଗଜପତି ଜିଲାପାଳଙ୍କୁ ନିର୍ଦ୍ଦେଶ ଜାରି କରିଛନ୍ତି।