ବଅଁରପାଳ,୯ା୮(ଡି.ଏନ୍.ଏ.): କେନ୍ଦ୍ର ସରକାରଙ୍କ ନବରତ୍ନପ୍ରାପ୍ତ ରାଷ୍ଟ୍ରାୟତ ଉଦ୍ୟୋଗ ନାଲ୍କୋକୁ ଘରୋଇକରଣ କରିବା ପାଇଁ ଚକ୍ରାନ୍ତ କରାଯାଉଥିବା ବିଭିନ୍ନ ଶ୍ରମିକ ସଂଘ ପକ୍ଷରୁ ଅଭିଯୋଗ ହେଉଛି। କେନ୍ଦ୍ର ସରକାରଙ୍କ ଶ୍ରମ ଆଇନ ପରିବର୍ତ୍ତନ ଏବଂ ରାଷ୍ଟ୍ରାୟତ ଉଦ୍ୟୋଗ ସେବାମୂଳକ ସଂସ୍ଥାର ଘରୋଇକରଣ ବିରୋଧରେ ରବିବାର ସକାଳେ ନାଲ୍କୋ ସ୍ମେଲଟର ମୁଖ୍ୟ ଫାଟକ ସମୁଖରେ ନାଲ୍କୋ କୋଅଡିନେଶନ କମିଟି ପକ୍ଷରୁ ଭିକ୍ଷୋଭ ପ୍ରଦର୍ଶନ କରାଯାଇଥିଲା। ଏଥିରେ ଆଇଏନ୍ଟିୟୁସି ଏଚ୍ଏମ୍ଏସ୍ ସିଟୁ ଓ ଏଆଇଟିୟୁସି ପ୍ରମୁଖ ଶ୍ରମିକ ସଙ୍ଗଠନ ପ୍ରମୁଖ ଯୋଗ ଦେଇଥିଲେ। ନାଲ୍କୋ ଭଳି ଲାଭଦାୟକ ଶିଳ୍ପସଂସ୍ଥା ସରକାରଙ୍କୁ ବହୁ ଲାଭ ଦେଉଥିବା ବେଳେ ଏଭଳି ସଂସ୍ଥାକୁ ଘରୋଇ କମ୍ପାନୀ ହାତରେ ଟେକି ଦେଲେ ଦେଶ ତଥା କମ୍ପାନୀର ବହୁ କ୍ଷତି ହେବ ବୋଲି ଶ୍ରମିକ ନେତାମାନେ ମତବ୍ୟକ୍ତ କରିଥିଲେ। ଆଗାମୀ ଦିନରେ ଏହା ବିରୋଧରେ ବ୍ୟାପକ ଆନ୍ଦୋଳନ ହେବ ବୋଲି ସେମାନେ ଚେତାବନୀ ଦେଇଛନ୍ତି। ଏହି ବିକ୍ଷୋଭରେ ଏନ୍ଏସ୍ସିୟୁର ସାଧାରଣ ସମ୍ପାଦକ ପରେଶ ଚନ୍ଦ୍ର ଜେନା, କାର୍ଯ୍ୟକାରୀ ସଭାପତି ବିଭବ ଜେନା, ସୁଜିତ୍ ସେଠ, ହେମନ୍ତ ପ୍ରଧାନ, ନେପୁର କାର୍ଯ୍ୟକାରୀ ସଭାପତି ମାଙ୍ଗିଲାଲ ସାମଲ ପ୍ରମୁଖ ସାମିଲ ଥିଲେ।