ନୂଆଦିଲ୍ଲୀ, ୨୪।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ୧୧ ସର୍ବାଧିକ କରୋନା ପ୍ରଭାବିତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟମନ୍ତ୍ରୀମାନଙ୍କ ସହ ଉଚ୍ଚସ୍ତରୀୟ ବୈଠକରେ ସ୍ଥିତିର ସମୀକ୍ଷା କରିଛନ୍ତି। ମହାମାରୀ ବିରୋଧରେ ସାମୂହିକ ସାମର୍ଥ୍ୟ ସହ ଏକାଠି କାମ କରିବା ପାଇଁ ମୋଦି ଆହ୍ବାନ ଦେଇଛନ୍ତି। ଗୋଟିଏ ରାଷ୍ଟ୍ର ଭାବେ କାର୍ଯ୍ୟ କଲେ ସମ୍ବଳର ଅଭାବ ରହିବ ନାହିଁ ବୋଲି ସେ କହିଛନ୍ତି।
ଅକ୍ସିଜେନ ଯୋଗାଣ ବଢ଼ାଇବା ପାଇଁ ଉଦ୍ୟମ ଜାରି ରହିଛି। ସରକାରଙ୍କର ସମସ୍ତ ସମ୍ପୃକ୍ତ ବିଭାଗ ଓ ମନ୍ତ୍ରଣାଳୟ ଏକାଠି କାର୍ଯ୍ୟ କରୁଛନ୍ତି। ଆବଶ୍ୟକ ଚାହିଦା ମେଣ୍ଟାଇବା ପାଇଁ ଶିଳ୍ପ ଲାଗି ଉଦ୍ଦିଷ୍ଟ ଅକ୍ସିଜେନ୍କୁ ରୋଗୀଙ୍କ ବ୍ୟବହାର ନିମନ୍ତେ ପଠାଯାଉଛି। ଔଷଧ ଓ ଅକ୍ସିଜେନ୍ ଆବଶ୍ୟକତା ପୂରଣ ପାଇଁ ସବୁ ରାଜ୍ୟ ସମନ୍ବୟ ରକ୍ଷା କରି ଏକାଠି କାର୍ଯ୍ୟ କରିବା ଆବଶ୍ୟକ। ବେଆଇନ ମହଜୁଦ୍ ଓ କଳାବଜାର ରୋକିବା ଲାଗି ସେ ରାଜ୍ୟଗୁଡ଼ିକୁ ଆହ୍ବାନ ଦେଇଛନ୍ତି। ଅକ୍ସିଜେନ୍ ଟ୍ୟାଙ୍କର ଯେଉଁ ରାଜ୍ୟକୁ ଯାଉଥାଉ ନା କାହିଁକି ଏହାକୁ ଯେପରି ଅଟକା ନ ଯାଏ ପ୍ରତ୍ୟେକ ରାଜ୍ୟ ତାହା ନିଶ୍ଚିତ କରିବା ଲାଗି ମୋଦି ପରାମର୍ଶ ଦେଇଛନ୍ତି। ସେହିପରି ବିଭିନ୍ନ ହସ୍ପିଟାଲକୁ ଅକ୍ସିଜେନ ଯୋଗାଣ ନେଇ ରାଜ୍ୟଗୁଡ଼ିକ ଉଚ୍ଚସ୍ତରୀୟ ସମନ୍ବୟ କମିଟି ଗଠନ କରିବା ଲାଗି ସେ ଅନୁରୋଧ କରିଥିଲେ।
