ଏମ୍‌ଜିଏନ୍‌ଆର୍‌ଇଜିଏସ୍‌ରେ କାମକରି ମିଳୁନି ପାଉଣା

ନୂଆପଡ଼ା,୧୨ା୩ (ମକାରୁ ବେମାଲ): ନୂଆପଡ଼ା ଜିଲାରେ ଏମ୍‌ଜିଏନ୍‌ଆର୍‌ଇଜିଏସ୍‌ରେ ଶ୍ରମିକମାନଙ୍କୁ କାମ ଯୋଗାଇ ପ୍ରବାସୀ ଶ୍ରମିକ ରୋକିବାରେ ସହାୟକ ହୋଇଛି ବୋଲି ପ୍ରଶାସନ କହୁଛି। ହେଲେ ଏହି ଯୋଜନାରେ କାମକରି ମଧ୍ୟ ଦୀର୍ଘ ୩ ବର୍ଷ ହେବ ପାଉଣା ନ ପାଇ ଦୁର୍ଦ୍ଦିନରେ କାଳ କାଟୁଛନ୍ତି ବହୁ ଶ୍ରମିକ। ଏଭଳି ଦୃଶ୍ୟ ନୂଆପଡ଼ା ସଦର ବ୍ଲକ୍‌ ଟାନ୍‌ୱାଟ ପଞ୍ଚାୟତରେ ଦେଖିବାକୁ ମିଳିଛି। ପ୍ରାପ୍ତ ସୂଚନା ଅନୁଯାୟୀ ଟାନ୍‌ୱାଟ ପଞ୍ଚାୟତ ଟାନ୍‌ୱାଟ ଗାଁର ହିତାଧିକାରୀ ହେମୁ କୁମାର ନିଆଲ ୨୦୨୧-୨୨ରେ ଏମ୍‌ଜିଏନ୍‌ଆର୍‌ଇଜିଏସ୍‌ରେ ପଞ୍ଚାୟତ ତରଫରୁ ଏକ ଚହଲା (ଫାର୍ମପଣ୍ଡ) ଖନନ ପାଇଁ ଅର୍ଥ ମଞ୍ଜୁର ହୋଇ ଖନନ କାର୍ଯ୍ୟ ଆରମ୍ଭ କଲେ। ହେଲେ ଆଜକୁ ୩ ବର୍ଷରୁ ଊର୍ଦ୍ଧ୍ୱ ହେବ ଚହଲା ଖନନରେ ନିୟୋଜିତ ଶ୍ରମିକଙ୍କୁ ପାଉଣା ମିଳିନାହିଁ। ଟାନ୍‌ୱାଟ ଗାଁର ଶ୍ରମିକ ଗୋବର୍ଦ୍ଧନ ରାଉତ ୨୪ ଗୋଦି, ସତ୍ୟଭାମା ରାଉତ ୨୪ ଗୋଦି, ସୁଶୀଳା ରାଉତ ୧୪ ଗୋଦି, ପେକଲାଲ ସାହୁ ୧୧ ଗୋଦି, ଭିକୁରାମ ସାହୁ ୧୫ ଗୋଦି, କାଶୀରାମ ରାଉତ ଓ ରଇବାରୀ ରାଉତ ୧୬ ଗୋଦି, ରାମଦେଓ ସାହୁ ୨୩ ଗୋଦି, ଆଶାରାମ ସାହୁ ୩୩ ଗୋଦି, ଛବି ସାହୁ ୨୧ ଗୋଦି, ରଜନୀ ରାଉତ ୮ ଗୋଦି, ହଳଧର ସାହୁ ୧୪ ଗୋଦି, ପିଲି ରାଉତ ୧୦ ଗୋଦି, ଗଣେଶୀ ସାହୁ ୭ ଗୋଦି, ରଜନୀ ସାହୁ ୧୨ ଗୋଦି, ଗିରିବର ସାହୁ, ବିଶାଳ ରାଉତ, ରାଜାରାମ ରାଉତ ପ୍ରମୁଖ ମାଟି କାମ କରି ପାଉଣା ପାଇନାହାନ୍ତି। ବର୍ଷ ବର୍ଷ ଧରି ପାଉଣା ନ ପାଇ ସେମାନଙ୍କ ପରିବାର କିପରି ଚଳୁଥିବେ ତାହା ସହଜେ ଅନୁମେୟ। ଶୀଘ୍ର ସେମାନଙ୍କ ପାଉଣା ପ୍ରଦାନ କରିବାକୁ ଶ୍ରମିକମାନେ ଦାବି କରିଛନ୍ତି।ଏ ସଂକ୍ରାନ୍ତରେ ସଦର ବ୍ଲକ୍‌ ବିଡିଓ ରୋହିତ ଭୋଇଙ୍କୁ ପଚାରିବାରୁ ଏହାର ତଦନ୍ତକରି ଶୀଘ୍ର ଶ୍ରମିକମାନଙ୍କୁ ପାଉଣା ଯୋଗାଇ ଦିଆଯିବ ବୋଲି କହିଛନ୍ତି।