ପାଲଲହଡ଼ା,୧୨ା୮(ଦିବ୍ୟଜ୍ୟୋତି ଦାଶ): ରୋଜଗାରିଆ ପୁଅ ଏବେ ରୋଗଗ୍ରସ୍ତ। ୬ ମାସ ହେଲା ମାନସିକ ବିକୃତି ଦେଖାଦେଇଥିବାରୁ ଉପାୟଶୂନ୍ୟ ହୋଇପଡ଼ିଛନ୍ତି ବୃଦ୍ଧ ମାତା ପିତା। ଚିକିତ୍ସା ପାଇଁ ଅନେକଥର ଚେଷ୍ଟା କରିଛନ୍ତି। ହେଲେ ଆର୍ଥିକ ଦୁରବସ୍ଥା ଯୋଗୁ ପୁଅକୁ ଭଲ କରିବା ସମ୍ଭବ ହୋଇପାରିନାହିଁ। ତେଣୁ ଗୋଡ଼ରେ ବେଡି ପକାଇ ଘରେ ରଖିଥିବା ପରିବାର ଲୋକେ ପୁଅଙ୍କୁ ଚିକିତ୍ସା ପାଇଁ ଅନୁଗୋଳ ଜିଲା ପାଲଲହଡ଼ା ଉପଖଣ୍ଡ ମେଡିକାଲକୁ ଆଣିଥିଲେ। ସେଠାରେ ଏପରି ଦୃଶ୍ୟ ଦେଖି କେତେଜଣ ବୁଦ୍ଧିଜୀବୀ ଡାକ୍ତରଖାନା କର୍ତ୍ତୃପକ୍ଷଙ୍କୁ ଜଣାଇବା ପରେ ସମ୍ପୃକ୍ତ ମାନସିକ ରୋଗୀଙ୍କ ଗୋଡ଼ରୁ ବେଡ଼ି ଖୋଲାଯାଇ ଚିକିତ୍ସା କରାଯାଇଥିଲା।
ସୂଚନା ଅନୁଯାୟୀ, ପାଲଲହଡ଼ା ବ୍ଲକ ଝାରବେଡା ପଞ୍ଚାୟତ କଦଳୀବାରି ଗାଁର ୨୫ ବର୍ଷୀୟ ଯୁବକ ହେଲେ ଗାରଦୀ ବିରୁଆ। ଗାରଦୀଙ୍କ ପରିବାର କହିଲେ ସ୍ତ୍ରୀ, ବୃଦ୍ଧ ମାତା ଓ ପିତା କାହ୍ନୁ ବିରୁଆ। ଗାରଦୀ ଘରର ଏକମାତ୍ର ରୋଜଗାରିଆ ବ୍ୟକ୍ତି ଥିଲେ। ଗାଁରେ ମୂଲମଜୁରି କରି ପରିବାର ଚଳାଇ ଆସୁଥିଲେ। ହେଲେ ୬ ମାସ ତଳେ ହଠାତ ତାଙ୍କ ମାନସିକ ସ୍ଥିତି ଖରାପ ହୋଇଯାଇଥିଲା। ପରିବାର ଲୋକେ ତାଙ୍କର ଚିକିତ୍ସା କରାଇଥିଲେ ମଧ୍ୟ ଏଥିରେ ଅର୍ଥ ବାଧକ ସାଜିଥିଲା। ତେଣୁ ଅଧିକ ଚିକିତ୍ସା କରି ନ ପାରି ପରିବାର ଲୋକେ ନିରାଶ ହୋଇଥିଲେ। ଦିନକୁ ଦିନ ଗାରଦୀଙ୍କ ମାନସିକ ଅବସ୍ଥା ଅଧିକ ବିଗିଡ଼ିବା ସହ ତାଙ୍କ ଆଚରଣରେ ଉଗ୍ରତା ଦେଖିବାକୁ ମିଳିଥିଲା। ତେଣୁ ପରିବାର ଲୋକେ ବାଧ୍ୟ ହୋଇ ତାଙ୍କୁ ଶିକୁଳିରେ ବାନ୍ଧି ଘରେ ରଖିଥିଲେ। ଗତ ବୁଧବାର ଗାରଦୀଙ୍କ ସ୍ବାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ଚିକିତ୍ସା ପାଇଁ ପାଲଲହଡ଼ା ଉପଖଣ୍ଡ ଚିକିତ୍ସାଳୟକୁ ଅଣାଯାଇଥିଲା। ହେଲେ ଗୋଡରେ ବେଡି ବନ୍ଧା ଯାଇଥିବା ଦେଖି କେତେଜଣ ବୁଦ୍ଧିଜୀବୀ ଡାକ୍ତରଖାନା କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ଗାରଦୀଙ୍କ ଗୋଡ଼ରୁ ବେଡ଼ି ଖୋଲାଯାଇ ସେଠାରେ ତାଙ୍କର ପ୍ରାଥମିକ ଚିକିତ୍ସା କରାଯିବା ସହ ଅଧିକ ଚିକିତ୍ସା ପାଇଁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ଏ ସମ୍ପର୍କରେ ଉପଖଣ୍ଡ ଡାକ୍ତରଖାନାର ଡାକ୍ତର କହିଛନ୍ତି, ସ୍ବାସ୍ଥ୍ୟକେନ୍ଦ୍ରରେ ଥିବା ସୁବିଧା ଅନୁଯାୟୀ ଗାରଦୀଙ୍କ ଚିକିତ୍ସା କରାଯାଇଛି। ଉନ୍ନତ ଚିକିତ୍ସାର ଆବଶ୍ୟକତା ଥିବାରୁ ତାଙ୍କୁ ଅନୁଗୋଳ ପଠାଇ ଦିଆଯାଇଛି।
