ନୂଆଦିଲ୍ଲୀ,୨୪ା୭:ମହାମାରୀ କରୋନା ଯୋଗୁ ବିଭିନ୍ନ କାର୍ଯ୍ୟ ଘରେ ରହି କରିବାକୁ ପଡ଼ୁଛି। ବିଭିନ୍ନ ସରକାରୀ ବେସରକାରୀ କାର୍ଯ୍ୟକୁ ଲୋକମାନେ କାର୍ଯ୍ୟସ୍ଥଳକୁ ନ ଯାଇ ଘରେ ରହି କରୁଛନ୍ତି। ଏଭଳି ସ୍ଥିତିରେ ୮୨ ପ୍ରତିଶତ ଲୋକ ମହାମାରୀ ପରେ କାର୍ଯ୍ୟସ୍ଥଳୀ ଗୁରୁତ୍ୱ ହରାଇବ ବୋଲି ମତ ଦେଇଛନ୍ତି। କରାଯାଇଥିବା ସର୍ଭେରେ ମୋଟ ୩୪ ହଜାର ଲୋକଙ୍କ ମତାମତ ଗ୍ରହଣ କରାଯାଇଥିଲା। ବିଭିନ୍ନ ଆଇଟି କମ୍ପାନୀର କର୍ମଚାରୀଙ୍କୁ ଡିସେମ୍ବର ୩୧ ପର୍ଯ୍ୟନ୍ତ ଘରେ ରହି କାମ କରିବାକୁ ସରକାର ନିର୍ଦ୍ଦେଶ ଦେବା ପରେ ଏଭଳି ସର୍ଭେ କରାଯାଇଥିଲା। କର୍ମଚାରୀମାନଙ୍କ ସୁରକ୍ଷା ଲାଗି ଇନ୍ଫୋସିସ୍,ଫୁଜିଟ୍ସୁ ଭଳି କମ୍ପାନୀ ଘରେ ରହି କାମ କରିବାକୁ କହିଛନ୍ତି। ମାର୍ଚ୍ଚ ପରଠାରୁ ଦେଶର ବିଭିନ୍ନ ସଂସ୍ଥା କର୍ମଚାରୀଙ୍କୁ ଘରେ ରହି କାମ କରିବା ଲାଗି ନିର୍ଦ୍ଦେଶ ଦେଇଛନ୍ତି। ଲକ୍ଡାଉନ୍ ଲାଗୁ ହେବା ପରେ ଅଫିସ୍ ଆସି କାର୍ଯ୍ୟ କରିବା ଏକପ୍ରକାର ବନ୍ଦ ହୋଇଯାଇଥିଲା।
ଲେନୋଭୋର ଗ୍ଲୋବାଲ ରିସର୍ଚ୍ଚ ରିପୋର୍ଟରେ ଅଧିକାଂଶ ଭାରତୀୟ ଘରେ ରହି କାର୍ଯ୍ୟ କରିବାକୁ ଅଧିକ ପସନ୍ଦ କରିଛନ୍ତି। ଅଫିସ୍ ବା କାର୍ଯ୍ୟସ୍ଥଳୀ ପ୍ରତି ସେମାନେ ସେତେ ଆଗ୍ରହୀ ନ ଥିବା ପ୍ରକାଶ କରିଛନ୍ତି। ଲାପ୍ଟପ୍, ଡେସ୍କଟପ୍ କମ୍ପ୍ୟୁଟର ସହ ସେମାନେ କାର୍ଯ୍ୟସ୍ଥଳୀ ଅପେକ୍ଷା ଘରେ କାର୍ଯ୍ୟ କରିବାକୁ ଶ୍ରେୟ ମଣିଛନ୍ତି। ସର୍ଭେରେ ଏଭଳି ଲୋକଙ୍କ ସଂଖ୍ୟା ୮୫% ବୋଲି ଦର୍ଶାଯାଇଛି। ପାଖାପାଖି ଦୁଇ ତୃତୀୟାଂଶ (୬୩%) ଲୋକଙ୍କ ମତ ହେଲା କାର୍ଯ୍ୟସ୍ଥଳୀ ଅପେକ୍ଷା ସେମାନେ ଘରେ ରହି ଅଧିକ ଦକ୍ଷତାର ସହ କାମ କରିପାରିବେ। ୫୨% ଲୋକଙ୍କ ମତ ହେଲା ମହାମାରୀ କରୋନା ଚାଲିଯିବା ପରେ ଅର୍ଥାତ୍ ସାମାଜିକ ଦୂରତ୍ୱ କଟକଣା ଉଠିବା ପରେ ମଧ୍ୟ ଘରେ ରହି କାର୍ଯ୍ୟ କରିବା ସେମାନଙ୍କ ଲାଗି ଉପଯୁକ୍ତ ହେବ। ସେମାନେ ଅଧିକ ଦକ୍ଷ ହୋଇ ଅଧିକରୁ ଅଧିକ କାମ କରିପାରେିବେ। ତେବେ ମୋଟାମୋଟି ଭାବେ ଦେଖିବାକୁ ଗଲେ ଅଧିକାଂଶ ଲୋକଙ୍କ କାର୍ଯ୍ୟସ୍ଥଳୀ ପ୍ରତି ବିମୁଖତା ଦେଖିବାକୁ ମିଳିଛି। କାର୍ଯ୍ୟସ୍ଥଳୀ ଅପେକ୍ଷା ସେମାନେ ଘରେ ରହି କାର୍ଯ୍ୟ କରିବାକୁ ଉଚିତ ମନେ କରୁଛନ୍ତି ବୋଲି ଲେନୋଭୋ ପକ୍ଷରୁ ଦର୍ଶାଯାଇଛି।