ନୂଆଦିଲ୍ଲୀ,୧।୧୨: ବିଶ୍ୱ ଏଡସ ଦିବସ ଅବସରରେ ଏକ ସର୍ଭେ ରିପୋର୍ଟ ପ୍ରକାଶ ପାଇଛି। ଏଥିରେ ଦର୍ଶାଯାଇଛି ଯେ, ୫୭ ପ୍ରତିଶତ ଭାରତୀୟ ଯୌନ ସମ୍ପର୍କ ସମୟରେ କଣ୍ଡୋମ ଭଳି କୌଣସି ପ୍ରକାର କଣ୍ଟ୍ରାସେପଶନ ବ୍ୟବହାର କରୁ ନାହାନ୍ତି। ଯାହା ଫଳରେ ସେମାନଙ୍କୁ ଯୌନ ସଂକ୍ରମିତ ରୋଗ ହୋଇପାରେ। ଭାରତୀୟ ସହରଗୁଡ଼ିକ ମଧ୍ୟରେ ଅହମ୍ମଦାବାଦରେ ଖୁବ୍ କମ୍ ଏବଂ ଦିଲ୍ଲୀ-ଏନ୍ସିଆରରେ ସର୍ବାଧିକ କଣ୍ଟ୍ରାସେପଶନ ବ୍ୟବହାର ହେଉଛି।
ଅଗରତାଲା, ବେଙ୍ଗାଲୁରୁ, ବରେଲି, ଭୋପାଳ, ମୁମ୍ବାଇ, ପାଟଣା, ଚେନ୍ନାଇ, ନୋଏଡା ଓ ବିଶାଖପାଟନମ ଭଳି ସ୍ଥାନରୁ ୨୫ ହଜାରରୁ ଊର୍ଦ୍ଧ ଭାରତୀୟଙ୍କ ମତକୁ ନେଇ ସ୍ବଚ୍ଛତା ଭିତ୍ତିକ (ହାଇଜିନ) ବ୍ରାଣ୍ଡ ପି ସେଫ ପକ୍ଷରୁ ସର୍ଭେ କରାଯାଇଥିଲା। ଦିଲ୍ଲୀରୁ ସର୍ବାଧିକ ୪,୯୮୦ ମତଦାତା ଭାଗ ନେଇଥିଲେ। ଅଂଶଗ୍ରହଣ କରିଥିବା ୭୦ ପ୍ରତିଶତ ମତଦାତାଙ୍କ ବୟସ ୧୯ରୁ ୨୯ ମଧ୍ୟରେ। ୨୫.୮ ପ୍ରତିଶତ ୩୦ରୁ ୪୯ ବୟସ ବର୍ଗ ହୋଇଥିବା ବେଳେ ୫୦ରୁ ୬୦ ବୟର କେବଳ ୧.୮ ପ୍ରତିଶତ ମତଦାତା ଭାଗ ନେଇଥିଲେ।
କେଉଁ ଭଳି କଣ୍ଡୋମ ବ୍ୟବହାର କରିବାକୁ ପସନ୍ଦ କରନ୍ତି? ଏହି ପ୍ରଶ୍ନର ଉତ୍ତରରେ ୫୬.୧୫ ପ୍ରତିଶତ ମତଦାତା ପୁରୁଷଙ୍କ ଲାଗି ବ୍ୟବହୃତ କଣ୍ଡୋମ ଓ ୭.୨୧% ମତଦାତା ମହିଳାଙ୍କ କଣ୍ଡୋମ ବ୍ୟବହାର କରିବାକୁ ପସନ୍ଦ କରୁଥିବା କହିଥିବା ବେଳେ ୪.୧୪% ମହିଳାଙ୍କ କଣ୍ଡୋମ ବିଷୟରେ କଦାପି ଶୁଣି ନ ଥିବା କହିଛନ୍ତି।
