ଓ୍ବାଶିଂଟନ/ନୂଆଦିଲ୍ଲୀ,୧୭।୧୦: କରୋନା ମହାମାରୀ ବିରୋଧରେ ସଫଳ ଟିକାକରଣ କାର୍ଯ୍ୟକ୍ରମ ପାଇଁ ବିଶ୍ୱ ବ୍ୟାଙ୍କ ଅଧ୍ୟକ୍ଷ ଡେଭିଡ ମାଲପାସ ଭାରତକୁ ଅଭିନନ୍ଦନ ଜଣାଇଛନ୍ତି। ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସହ ଏକ ବୈଠକରେ ସେ ଟିକା ଉତ୍ପାଦନ ତଥା ବିତରଣରେ ଅନ୍ତର୍ଜାତୀୟସ୍ତରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବାରୁ ଭାରତକୁ ଧନ୍ୟବାଦ ଜଣାଇଛନ୍ତି।
ସୀତାରମଣଙ୍କ ସହ ତାଙ୍କର ସାକ୍ଷାତ ସମୟରେ ମାଲପାସ ୱାଶିଂଟନ ଭିତ୍ତିକ ଅନ୍ତର୍ଜାତୀୟ ଆର୍ଥିକ ପ୍ରତିଷ୍ଠାନର ଆନ୍ତର୍ଜାତୀକ ଅର୍ଥ ନିଗମ ଏବଂ ବହୁପକ୍ଷୀୟ ନିବେଶ ଗ୍ୟାରେଣ୍ଟି ଏଜେନ୍ସି ସମେତ ବିଶ ବ୍ୟାଙ୍କ ଗ୍ରୁପର ସମସ୍ତ ସଂସ୍ଥା ମଧ୍ୟରେ ଭାରତ ସହିତ ପ୍ରତିବଦ୍ଧତାକୁ ଦୋହରାଇଛନ୍ତି। ବିଶ୍ୱ ବ୍ୟାଙ୍କ ଏକ ବିବୃତ୍ତି ଜାରି କରି କହିଛି ଯେ ଜଳବାୟୁ ପରିବର୍ତ୍ତନ ନେଇ ଭାରତର ଉଦ୍ୟମ ଉପରେ ମଧ୍ୟ ସେମାନେ ଆଲୋଚନା କରିଛନ୍ତି।
ଏସବୁ ବ୍ୟତୀତ ଡେଭିଡ ଅନ୍ତର୍ଜାତୀୟ ବିକାଶ ଆସୋସିଏଶନରେ ଭାରତର ସକ୍ରିୟ ଅବଦାନକୁ ମଧ୍ୟ ପ୍ରଶଂସା କରିଛନ୍ତି। ଭବିଷ୍ୟତରେ ମଧ୍ୟ ଭାରତ ଏଭଳି ନିର୍ଣ୍ଣାୟକ ଭୂମିକା ଗ୍ରହଣ କରିବ ବୋଲି ସେ ଆଶା ପ୍ରକଟ କରିଛନ୍ତି। ବାର୍ତ୍ତାଳାପ ସମୟରେ ଭାରତୀୟ ଅର୍ଥନୀତି ଉପରେ ମଧ୍ୟ ଆଲୋଚନା କରାଯାଇଥିଲା। ବିଶ୍ୱ ବ୍ୟାଙ୍କ ଅଧ୍ୟକ୍ଷ ଖୁସି ବ୍ୟକ୍ତ କରିଛନ୍ତି ଯେ ସମୟ ସହିତ ଭାରତ ଅନେକ ଗୁରୁତ୍ୱପୂର୍ଣ୍ଣ ସଂସ୍କାର ଆଣିଛି। ସେ କହିଛନ୍ତି ଯେ ବିଶ୍ୱ ବ୍ୟାଙ୍କରୁ ଭାରତ ସବୁ ପ୍ରକାର ସହାୟତା ପାଇ ପାଇବ।
