ଅହମଦାବାଦ,୧୭।୧୧: ୨୦୨୩ ଦିନିକିଆ ବିଶ୍ୱକପ୍ ଫାଇନାଲ ମ୍ୟାଚ୍ ଅହମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ନଭେମ୍ବର ୧୯ ତାରିଖରେ ଖେଳାଯିବ। ଫାଇନାଲ ମ୍ୟାଚ୍ରେ ଭାରତ-ଅଷ୍ଟ୍ରେଲିଆ ମଧ୍ୟରେ ହେବ ମହାମୁକାବିଲା। ଇତିମଧ୍ୟରେ ଟିମ୍ ଇଣ୍ଡିଆ ଖେଳାଳି ଅଭ୍ୟାସ ପାଇଁ ଅହମଦାବାଦରେ ପହଞ୍ଚି ସାରିଛନ୍ତି। ଅନ୍ୟପକ୍ଷେ ଫାଇନାଲ ମ୍ୟାଚ୍କୁ ନେଇ ପ୍ରଶଂସକଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି। ମ୍ୟାଚ ଦେଖିବା ପାଇଁ ବିଭିନ୍ନ ରାଜ୍ୟରୁ କ୍ରିକେଟ୍ପ୍ରେମୀ ଅହମଦାବାଦରେ ପହଞ୍ଚିବା ଆରମ୍ଭ କରିଦେଇଛନ୍ତି। ଏହି ପରିପ୍ରେକ୍ଷୀରେ ହୋଟେଲ ଭଡ଼ା ସାଙ୍ଗକୁ ବିମାନ ଟିକେଟ୍ ମୂଲ୍ୟ ବୃଦ୍ଧି ପାଇଥିବା ଏକ ଜୀତୀୟ ଗଣମାଧ୍ୟମ ରିପୋର୍ଟରେ ପ୍ରକାଶ ପାଇଛି।
ରିପୋର୍ଟ ଅନୁସାରେ, ବେଙ୍ଗାଲୁରୁ-ଅହମଦାବାଦ ଯିବା ପାଇଁ ଟିକେଟ୍ ମୂଲ୍ୟ ୫, ୭୦୦ ଟଙ୍କାରୁ ଆରମ୍ଭ ହୋଇଥାଏ। ହେଲେ ରବିବାର ଭାରତ-ଅଷ୍ଟ୍ରେଲିଆ ବିଶ୍ବକପ୍ ଫାଇନାଲ ମ୍ୟାଚ୍ ଦେଖିବା ପାଇଁ ଲୋକେ ଆଗେଇ ଆସିଛନ୍ତି। ଶନିବାର ଉକ୍ତ ରୁଟ୍ରେ ଯାତ୍ରା କରିବା ପାଇଁ ବିମାନ ଟିକେଟ ମୂଲ୍ୟ ୩୩,୦୦୦ ଟଙ୍କାକୁ ବୃଦ୍ଧି ପାଇଥିବା ଜଣାପଡିଛି।
ଶନିବାର ‘ଇଣ୍ଡିଗୋ’ରେ ବଙ୍ଗାଲୁରୁରୁ ଅହମଦାବାଦକୁ ସିଧାସଳଖ ୬ଟି ବିମାନ ଚଳାଚଳ କରିଥିଲେ ମଧ୍ୟ ଟିକେଟ୍ ମୂଲ୍ୟ ବୃଦ୍ଧି ପାଇଛି। କୌଣସି ଏକ ଇ-କମର୍ସ କମ୍ପାନୀରେ ମ୍ୟାନେଜର୍ ଭାବେ କାମ କରୁଥିବା ଜଣେ କ୍ରିକେଟେ ପ୍ରେମୀ କହନ୍ତି, ଟିଭିରେ ପ୍ରଥମ ସେମି-ଫାଇନାଲ ମ୍ୟାଚ୍ ଦେଖିଥିଲି। ଭାରତର ଦମ୍ଦାର ପ୍ରଦର୍ଶନ ଦେଖି ବେଶ୍ ଆନନ୍ଦ ଲାଗିଥିଲା। ତେଣୁ ଫାଇନାଲ ମ୍ୟାଚ୍ ଦେଖିବାକୁ ଅହମଦାବାଦ ଯିବାକୁ ଇଚ୍ଛା ପ୍ରକାଶ କରିଛି। ଏନେଇ ଶନିବାର ବେଙ୍ଗାଲୁରୁ-ଅହମଦାବାଦ ରାତି ୯ଟାରେ ‘ଇଣ୍ଡିଗୋ’ ବିମାନ ଟିକେଟ ବୁକ୍ କରିବା ପାଇଁ ‘ଲଗ୍ଇନ୍’ କରିବା ବେଳକୁ ଟିକେଟ୍ ମୂଲ୍ୟ ୩୨, ୯୯୯ ଟଙ୍କା ହୋଇଥିବା ଦେଖି ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି।
ସେହିପରି ବେଙ୍ଗାଲୁରୁର ଆଉ କେତେକ କ୍ରିକେଟ୍ପ୍ରେମୀ ମୁମ୍ବାଇରୁ ଅହମଦାବାଦ ଯିବା ନେଇ ବିମାନରେ ଟିକେଟ କରିଥିଲେ। ଟିକେଟ ମୂଲ୍ୟ ବାବଦକୁ ୧୬,୦୦୦ ଟଙ୍କା ଦେଇଥିବା ଜଣାପଡ଼ିଛି।
